पहाटेची वेळ… शहर झोपेत असताना पोलिसांचे पेट्रोलिंग सुरू होते. त्याचवेळी मिळालेल्या एका गुप्त माहितीने पोलिसांची नजर थेट इंदिरा नगरातील सहारा प्लॉटकडे वळली. पोलिसांनी घटनास्थळी धडक देताच सुरू असलेल्या गांजा विक्रीचा प्रकार उघडकीस आला आणि परिसरात एकच खळबळ उडाली.
दिनांक १३ ऑगस्ट रोजी पहाटेच्या सुमारास पेट्रोलिंग सुरू असताना मिळालेल्या गुप्त माहितीच्या आधारे पोलिसांनी इंदिरा नगर परिसरातील सहारा प्लॉट येथे धडक कारवाई केली. यावेळी गांजाची विक्री करत असल्याचे पोलिसांच्या निदर्शनास आल्याने एका ६१ वर्षीय आरोपीविरुद्ध अमली पदार्थ प्रतिबंधक कायद्यान्वये गुन्हा दाखल करण्यात आला.
पोलिसांनी दिलेल्या माहितीनुसार, शेख रोशन शेख आमद (६१), रा. तिडके प्लॉट, इंदिरा नगर याच्याकडून तब्बल ४६१ ग्रॅम गांजा जप्त करण्यात आला. जप्त केलेल्या गांजाची अंदाजे किंमत ६ हजार रुपये असल्याचे सांगण्यात आले.गांजाची विक्री केल्याप्रकरणी आरोपीविरुद्ध एनडीपीएस कायद्याच्या कलम ८(क), २०(ब)(२)(अ) अन्वये गुन्हा दाखल करण्यात आला आहे.
पहाटेच्या अंधाराचा फायदा घेत अमली पदार्थांची विक्री सुरू असल्याची माहिती मिळताच पोलिसांनी तातडीने घटनास्थळी पोहोचून कारवाई केली. त्यामुळे परिसरात अमली पदार्थांची विक्री करणाऱ्यांमध्ये खळबळ उडाली आहे.ही कारवाई ठाणेदार सचिन पाटील यांच्या मार्गदर्शनाखाली तपास अधिकारी गोपाल गिलबिले, प्रवीण कुंजाम, विनोद खर्डे, रोहन बोराडे आणि महिला पोलीस नेहा सोनोने यांनी केली.
इंदिरा नगर परिसरात गांजाची विक्री नेमकी किती दिवसांपासून सुरू होती आणि या प्रकरणामागे आणखी कोणाचा सहभाग आहे का, याचा तपास आता पोलिसांकडून करण्यात येत आहे.
Leave a Comment