राजकारणात काल जे अशक्य वाटत होतं, तेच अंबरनाथमध्ये वास्तवात उतरलं…कालपर्यंत एकमेकांविरोधात घोषणा देणारे आज एकाच मंचावर उभे राहिले आणि क्षणातच संपूर्ण महाराष्ट्राचं लक्ष अंबरनाथकडे वळलं. सत्तेसाठी झालेली अभद्र युती, त्यानंतरची कारवाई आणि अखेर काँग्रेसच्या निलंबित नगरसेवकांचा थेट भाजपमध्ये प्रवेश, या धक्कादायक घडामोडींनी अंबरनाथचं राजकारण अक्षरशः उलथवून टाकलं.
महाराष्ट्रातील अंबरनाथ नगर परिषद निवडणूक केवळ राज्यातच नव्हे, तर देशभरात राजकीय चर्चेचा केंद्रबिंदू ठरली होती. सत्तेसाठी भाजप आणि काँग्रेस एकत्र आल्याने राजकीय वर्तुळात आश्चर्याची लाट पसरली होती. वैचारिकदृष्ट्या कट्टर विरोधक असलेले हे दोन पक्ष एकत्र येणं अनेकांना धक्का देणारं ठरलं होतं.
अंबरनाथ नगर परिषदेत सत्तास्थापनेसाठी भाजपचे १४, काँग्रेसचे १२ आणि राष्ट्रवादी काँग्रेस (अजित पवार गट) चे ४ सदस्य एकत्र आले. या अनपेक्षित युतीनंतर अभिजीत गुलाबराव करंजुले पाटील यांची नगराध्यक्षपदी निवड झाली. मात्र हा सत्तेचा प्रयोग फार काळ टिकू शकला नाही.
अंबरनाथमधील हा सत्तेचा पॅटर्न देशभर गाजल्यानंतर मुख्यमंत्री देवेंद्र फडणवीस यांनी भाजपच्या स्थानिक पदाधिकाऱ्यांना कठोर शब्दांत सुनावलं. ही युती पक्षशिस्तीच्या विरोधात असल्याचं स्पष्ट करत तात्काळ युती तोडण्याचे आदेश देण्यात आले. यानंतर काँग्रेसनेही भाजपसोबत हातमिळवणी केल्याच्या कारणावरून आपल्या १२ निवडून आलेल्या नगरसेवकांवर निलंबनाची कारवाई केली.
या घडामोडीनंतर अंबरनाथच्या राजकारणात बुधवारी रात्री मोठा भूकंप झाला. काँग्रेसकडून निलंबित करण्यात आलेले सर्व १२ नगरसेवक थेट भाजपमध्ये दाखल झाले. भाजपचे प्रदेश नेते रविंद्र चव्हाण यांच्या उपस्थितीत या सर्वांचा औपचारिक पक्षप्रवेश पार पडला आणि त्याची अधिकृत घोषणाही करण्यात आली.
या पक्षप्रवेशामुळे अंबरनाथमधील राजकीय समीकरणे पूर्णपणे बदलली आहेत. काँग्रेससाठी हा मोठा धक्का मानला जात असून, भाजपसाठी ही संघटनात्मक ताकद वाढवणारी खेळी ठरत आहे. सत्तेसाठी झालेली अभद्र युती, त्यानंतरची कारवाई आणि अखेर काँग्रेस नगरसेवकांचा भाजपमध्ये प्रवेश, या संपूर्ण घडामोडींमुळे अंबरनाथची निवडणूक देशातील राजकीय चर्चेचा विषय ठरली आहे.
आगामी स्थानिक स्वराज्य संस्थांच्या निवडणुकांच्या पार्श्वभूमीवर अंबरनाथचा हा राजकीय धडा राज्यातील इतर शहरांसाठीही महत्त्वाचा ठरणार आहे. सत्तेसाठी होणाऱ्या तडजोडी आणि त्याचे राजकीय परिणाम किती दूरगामी असू शकतात, याचं जिवंत उदाहरण अंबरनाथने संपूर्ण देशाला दाखवून दिलं आहे.
Leave a Comment