अकोला महापालिका निवडणुकीसाठी उमेदवारी अर्ज दाखल करण्याची अंतिम मुदत मंगळवारी संपताच शहरातील राजकीय चित्र स्पष्ट झाले आहे. अखेरच्या दिवशी महापालिकेच्या सहा झोन कार्यालयांसमोर उमेदवार, समर्थक आणि पक्षनेत्यांची प्रचंड गर्दी पाहायला मिळाली. ढोल-ताशे, फटाके, मिरवणुका आणि जोरदार घोषणाबाजीच्या वातावरणात उमेदवारी अर्ज दाखल करण्यात आले.
यंदा भाजपसोबत युती न झाल्यामुळे शिंदेसेनेने सर्वाधिक ७४ जागांवर उमेदवार उभे केले असून, भाजपचा मित्रपक्ष असतानाही इतक्या मोठ्या संख्येने उमेदवार उतरवल्याने सत्तासमीकरणांमध्ये नेमका काय बदल होतो, याकडे लक्ष लागले आहे. शिंदेसेनेनंतर भाजपने ६२, उद्धवसेनेने ५५, तर काँग्रेसने ५० उमेदवार मैदानात उतरवले आहेत.
ऑल इंडिया मजलिस-ए-इत्तेहादुल मुस्लिमीन (एमआयएम) ने ३८ उमेदवार देत स्वतंत्र राजकीय अस्तित्व ठसवण्याचा प्रयत्न केला आहे. काँग्रेसचा मित्रपक्ष राष्ट्रवादी (शरद पवार) ने २५, तर भाजपचा मित्रपक्ष राष्ट्रवादी (अजित पवार) ने १४ उमेदवार दिले आहेत. वंचित बहुजन आघाडीने ५३ उमेदवार उभे करून आपली ताकद दाखवून दिली आहे.
शहरातील २० प्रभागांतून एकूण ८० नगरसेवक निवडले जाणार आहेत. आता अर्ज मागे घेण्याची प्रक्रिया पूर्ण झाल्यानंतरच अंतिम लढतींचे चित्र स्पष्ट होणार असून, अकोला महापालिका निवडणूक अधिकच चुरशीची ठरण्याचे संकेत मिळत आहेत.
Leave a Comment