२४ वर्षांनी आईच्या कुशीत परतला हरवलेला लेक! SIRच्या फेरतपासणीत जुळले माय-लेकराचे तुटलेले नाते;

मतदार यादीच्या विशेष फेरतपासणी प्रक्रियेमुळे (SIR) एका कुटुंबासाठी तब्बल २४ वर्षांपासून तुटलेले नाते पुन्हा जुळले. कौटुंबिक वादानंतर घर सोडून गेलेला मुलगा अखेर मतदार यादीच्या पडताळणीदरम्यान सापडला आणि आईला तिचा हरवलेला लेक पुन्हा मिळाला. बुलढाण्यातील मलकापूर येथे घडलेल्या या हृदयस्पर्शी घटनेने सरकारी प्रक्रियेलाही माणुसकीचा स्पर्श असतो, हे दाखवून दिले.

२४ वर्षांपूर्वी घर सोडलं अन् मलकापुरात थाटला संसार

सोलापूर जिल्ह्यातील करमाळा तालुक्यातील केडगाव येथील नवनाथ धोंडीबा गायकवाड हे कौटुंबिक वादानंतर तब्बल २४ वर्षांपूर्वी घरातून निघून गेले होते. त्यानंतर अनेक ठिकाणी भटकंती करत ते बुलढाणा जिल्ह्यातील मलकापूर येथे स्थायिक झाले. काळाच्या ओघात त्यांनी येथे संसारही थाटला.

मात्र, दुसरीकडे सोलापूरमधील आई, भाऊ आणि बहीण नवनाथ यांच्या परतीची वाट पाहत होते. २४ वर्षे उलटली, मात्र मुलाचा कोणताही ठावठिकाणा कुटुंबाला मिळत नव्हता.

SIRच्या पडताळणीत सापडला २४ वर्षांपासून हरवलेला मुलगा

राज्यात सुरू असलेल्या मतदार यादी फेरतपासणीच्या SIR प्रक्रियेदरम्यान बीएलओ नीता भोंबे आणि सहाय्यक बीएलओ अनिल भोंबे माहिती संकलनासाठी नवनाथ यांच्या घरी पोहोचले. मतदार यादीची पडताळणी करताना नवनाथ यांचे नाव सोलापूर जिल्ह्यातील मतदार यादीशी जोडलेले असल्याचे त्यांच्या लक्षात आले.

यानंतर त्यांनी करमाळा येथील संबंधित बीएलओंशी संपर्क साधला. या संपर्कातून नवनाथ यांचा मूळ पत्ता आणि कुटुंबीयांची माहिती समोर आली. तब्बल २४ वर्षांपासून हरवलेल्या मुलाचा ठावठिकाणा मिळाल्याची माहिती कुटुंबीयांना देण्यात आली.

४०० किलोमीटरचा प्रवास करून आई पोहोचली लेकाच्या दारात

नवनाथ जिवंत असल्याचे समजताच आई, भाऊ, बहीण आणि नातेवाईकांच्या आनंदाला पारावार उरला नाही. कोणताही विलंब न करता कुटुंबीयांनी जवळपास ४०० किलोमीटरचा प्रवास करत मलकापूर गाठले.

सकाळी अचानक आई आपल्या लेकासमोर उभी राहिली. २४ वर्षांनंतर आईने नवनाथ यांना मिठी मारताच दोघांच्याही भावनांचा बांध फुटला. आईच्या डोळ्यांतून अश्रू वाहू लागले. भाऊ, बहीण आणि उपस्थित नातेवाईकांचेही डोळे पाणावले. तब्बल २४ वर्षांची प्रतीक्षा एका मिठीत संपली.

सुनेच्या गळ्यात घातले स्वतःचे मंगळसूत्र; म्हणाल्या, ‘आता आमच्यासोबत घरी चला’

या भेटीतील सर्वात भावनिक क्षण म्हणजे नवनाथ यांच्या पत्नीची आणि त्यांच्या आईची भेट. सुरुवातीला नवनाथ यांच्या पत्नीला नेमके काय घडत आहे, हे समजलेच नाही. मात्र सत्य समोर आल्यानंतर वातावरण अधिकच भावूक झाले.

सासूबाईंनी आपल्या सुनेच्या गळ्यात स्वतःचे सोन्याचे मंगळसूत्र घातले. प्रेमाने सुनेला जवळ घेत त्या म्हणाल्या, ‘आता इथे नका राहू… आमच्यासोबत घरी चला.’ या शब्दांनी उपस्थितांचेही मन हेलावून गेले.

नवनाथ यांनीही लवकरच आपल्या मूळ गावी येण्याचे आश्वासन दिले.

भावाला भेटण्यासाठी डायलिसिसचा उपचारही पुढे ढकलला

या भावनिक भेटीचा आणखी एक हळवा पैलू म्हणजे नवनाथ यांचे धाकटे भाऊ अशोक. ते डायलिसिसच्या उपचारासाठी रुग्णालयात दाखल होते. मात्र २४ वर्षांनी मोठा भाऊ सापडल्याचे समजताच त्यांनी उपचार पुढे ढकलून आधी भावाला भेटण्याला प्राधान्य दिले.

भावाची भेट होताच २४ वर्षांची दुरावलेली नाती पुन्हा जुळली आणि उपस्थित वातावरण भावूक झाले.

सरकारी कागदपत्रांच्या पडताळणीतून जुळले तुटलेले नाते

मतदार यादीच्या फेरतपासणीसाठी सुरू असलेल्या SIR प्रक्रियेत बीएलओंच्या सतर्कतेमुळे एका कुटुंबाला तब्बल २४ वर्षांनी त्यांचा हरवलेला मुलगा मिळाला. एका आईला तिचा लेक, भावाला त्याचा मोठा भाऊ आणि बहिणीला तिचा लाडका भाऊ पुन्हा मिळाला.

सरकारी कागदपत्रांची पडताळणी करताना समोर आलेली माहिती आणि बीएलओंनी घेतलेली पुढाकाराची भूमिका या कुटुंबासाठी आयुष्यभर न विसरणारा क्षण ठरली.

२४ वर्षांची प्रतीक्षा, ४०० किलोमीटरचा प्रवास आणि एका मिठीत विरघळलेले अश्रू… मलकापुरातील ही घटना केवळ मतदार यादीच्या फेरतपासणीची कथा नाही, तर सरकारी कामातून जुळलेल्या एका तुटलेल्या कुटुंबाची हृदयस्पर्शी कहाणी ठरली आहे.