अकोट तालुक्यातील वस्तापूर-मानकरी शेतशिवारात रानडुकराने एका शेतमजुरावर अचानक हल्ला केल्याची धक्कादायक घटना घडली. या हल्ल्यात रमेश शिवराम कसदे (वय 60) हे गंभीर जखमी झाले असून, त्यांच्यावर पुढील उपचारासाठी अकोला शासकीय रुग्णालयात हलविण्यात आले आहे.
मिळालेल्या माहितीनुसार, रमेश कसदे हे नेहमीप्रमाणे शेतात काम करत असताना अचानक रानडुकराने त्यांच्यावर हल्ला चढवला. या हल्ल्यात त्यांच्या शरीरावर गंभीर जखमा झाल्या. स्थानिक नागरिकांनी तत्काळ त्यांना अकोट ग्रामीण रुग्णालयात दाखल केले. मात्र, जखमा गंभीर असल्याने डॉक्टरांनी त्यांना पुढील उपचारासाठी अकोला शासकीय वैद्यकीय महाविद्यालय व रुग्णालयात रेफर केले.
या घटनेमुळे परिसरातील शेतकरी व शेतमजुरांमध्ये भीतीचे वातावरण निर्माण झाले आहे. पिकांच्या संरक्षणासाठी शेतात जाणाऱ्या नागरिकांना वन्यप्राण्यांचा वाढता धोका जाणवत असून, वन विभागाने तातडीने उपाययोजना करून रानडुकरांचा बंदोबस्त करावा, अशी मागणी ग्रामस्थांनी केली आहे.
रानडुकरांच्या वाढत्या वावरामुळे शेतकऱ्यांचे आर्थिक नुकसान तर होतच आहे, शिवाय आता मानवी जीवितालाही धोका निर्माण होत असल्याने प्रशासनाने याकडे गांभीर्याने लक्ष देण्याची गरज व्यक्त केली जात आहे.
Leave a Comment