अकोला-वाशिम राष्ट्रीय मार्गावरील चिचखेड फाट्याजवळ गुरुवारी रात्री भीषण अपघात घडला. भरधाव ट्रॅक्टरच्या धडकेत चारचाकी वाहनाचा अक्षरशः चुराडा झाला असून वाहन चालक गंभीर जखमी झाला आहे. या घटनेमुळे परिसरात काही काळ खळबळ उडाली होती.
मिळालेल्या माहितीनुसार, पातूर पोलीस स्टेशन हद्दीतील चिचखेड फाट्याजवळ गुरुवारी रात्री सुमारे १० वाजताच्या दरम्यान हा अपघात झाला. वाशिमकडून येत असलेली एमएच ३० सीबी १८७७ क्रमांकाची चारचाकी गाडी मार्गावरून जात असताना मागून येणाऱ्या ट्रॅक्टरने जोरदार धडक दिली. धडक इतकी भीषण होती की चारचाकी वाहनाचे मोठ्या प्रमाणात नुकसान झाले आणि वाहनाचा समोरील भाग पूर्णपणे चुराड्यात परिवर्तित झाला.
या अपघातात विवरा येथील वाहन चालक अभिषेक मते हे गंभीर जखमी झाले. अपघातानंतर घटनास्थळी नागरिकांची मोठी गर्दी झाली. जखमी चालकाला तत्काळ मदत मिळावी यासाठी स्थानिकांनी आणि उपस्थित नागरिकांनी प्रयत्न केले.
घटनेची माहिती मिळताच पातूर पोलीस स्टेशनचे ठाणेदार डॉपेवाडे यांच्यासह पोलीस पथक घटनास्थळी दाखल झाले. यावेळी पत्रकार दुले खान, हुसेन खान, युसुफ खान, अनिकेत पोहरे, स्वप्नील गवई आणि इतर नागरिकांनी जखमीला मदत करत पुढील उपचारासाठी रुग्णालयात रवाना केले.
अपघातामुळे अकोला-वाशिम मार्गावर काही काळ वाहतुकीची कोंडी निर्माण झाली होती. पोलिसांनी आणि स्थानिक नागरिकांनी संयुक्तपणे प्रयत्न करून वाहतूक सुरळीत केली. त्यामुळे मोठा गोंधळ टळला.
दरम्यान, अपघाताचे नेमके कारण अद्याप स्पष्ट झाले नसून पातूर पोलीस पुढील तपास करीत आहेत. या घटनेमुळे परिसरातील वाहनचालकांमध्ये भीतीचे वातावरण निर्माण झाले असून रात्रीच्या वेळी वाहन चालविताना अधिक सतर्कता बाळगण्याची गरज व्यक्त होत आहे.
Leave a Comment