पातूरमध्ये संशयास्पद मांस वाहतूक उघड! पिकअप पकडला, आरोपी फरार; पोलिसांची कारवाई कुठे अडकली?

अकोला न्यूज नेटवर्क ब्युरो प्रतिनिधी स्वप्नील सुरवाडे अकोला जिल्ह्यातील पातूर येथे गोमांस सदृश्य मांसाची वाहतूक उघड झाल्याने एकच खळबळ उडाली आहे. रविवारी (१५ मार्च) रात्री सुमारे १० वाजताच्या सुमारास वाशिमहून अकोल्याकडे येणारा बोलेरो पिकअप (MH 04 FD 6928) पातूरजवळील माऊली बारसमोर टायर फुटल्याने दुभाजकाला धडकला.

❮ ❯

अपघातानंतर मदतीसाठी धावलेल्या स्थानिक नागरिकांना वाहनातून येणारा तीव्र वास जाणवला. संशय आल्याने पाहणी केली असता वाहनात गोवंशीय सदृश मांस भरलेले असल्याचे दिसून आले. नागरिकांनी चालकाला याबाबत विचारणा केली असता, तो तात्काळ घटनास्थळावरून फरार झाला.

घटनेची माहिती मिळताच पातूर पोलीस घटनास्थळी दाखल झाले. त्यांनी नॅशनल हायवे ऑथोरिटीच्या क्रेनच्या सहाय्याने वाहन रस्त्याच्या कडेला लावून वाहतूक सुरळीत केली. मात्र, या घटनेला २४ तासांहून अधिक कालावधी लोटूनही पोलिसांकडून कोणतीही ठोस कारवाई किंवा अधिकृत माहिती समोर आली नसल्याने नागरिकांमध्ये संताप व्यक्त होत आहे.

“वाहन पकडलं, पण आरोपी कुठे?” असा सवाल उपस्थित होत असून, या प्रकरणात नेमकं पाणी कुठं मुरलंय, अशी चर्चा जोर धरत आहे. संबंधितांवर कठोर कारवाई करून अशा बेकायदेशीर कृत्यांना आळा घालण्याची मागणी नागरिकांकडून होत आहे.