अकोला जिल्ह्यातील मूर्तिजापूर तालुक्यात देवरण शिवारात रानडुकराच्या जीवघेण्या हल्ल्याची धक्कादायक घटना समोर आली आहे. या हल्ल्यात ६० वर्षीय शेतमजूर गंभीर जखमी झाले असून परिसरात भीतीचे वातावरण निर्माण झाले आहे.
मिळालेल्या माहितीनुसार, सूरजप्रसाद विश्वास यांच्या शेतात आज सकाळी सुमारे ११ वाजताच्या सुमारास पाणी देण्याचे काम सुरू होते. यावेळी शेतमजूर करीम खान मोहम्मद खान (वय ६०) हे शेतात काम करत असताना अचानक एका रानडुकराने त्यांच्यावर हल्ला चढवला. अनपेक्षितपणे झालेल्या या हल्ल्यात त्यांच्या हाताला गंभीर जखम झाली असून मोठ्या प्रमाणात रक्तस्राव झाला.
घटनेनंतर परिसरातील शेतकऱ्यांनी तत्काळ धाव घेत जखमी करीम खान यांना उपचारासाठी रुग्णालयात दाखल केले. सध्या त्यांच्यावर उपचार सुरू असल्याची माहिती मिळत आहे. या घटनेमुळे देवरण शिवारासह आसपासच्या भागात शेतकऱ्यांमध्ये भीतीचे वातावरण निर्माण झाले आहे.
दरम्यान, शेतात काम करताना वन्य प्राण्यांच्या वाढत्या हल्ल्यांमुळे शेतकऱ्यांचे जीव धोक्यात येत असल्याची संतप्त प्रतिक्रिया नागरिकांनी व्यक्त केली आहे. वनविभागाने तातडीने उपाययोजना करून रानडुकरांचा बंदोबस्त करावा, तसेच जखमी मजूर करीम खान यांना शासनाकडून तात्काळ आर्थिक मदत द्यावी, अशी मागणी स्थानिक नागरिक व शेतकरी करत आहेत.
परिसरात वाढलेल्या रानडुकरांच्या वावरामुळे शेतकरी आणि शेतमजुरांच्या सुरक्षिततेचा प्रश्न निर्माण झाला असून वनविभागाने याकडे गांभीर्याने लक्ष देण्याची गरज व्यक्त केली जात आहे.
Leave a Comment