सेवेत स्थैर्य, सामाजिक प्रतिष्ठा आणि दीर्घकालीन सुरक्षित करिअर या कारणांमुळे पोलिस भरतीकडे उच्चशिक्षित तरुणांचा ओढा मोठ्या प्रमाणात वाढताना दिसत आहे. शहर व ग्रामीण पोलिस दलाच्या सुरू असलेल्या भरती प्रक्रियेत पदवीधर, पदव्युत्तर तसेच तांत्रिक शिक्षण घेतलेल्या उमेदवारांची मोठी उपस्थिती नोंदवली गेली आहे. त्यामुळे रोजगार बाजारातील वाढती स्पर्धा आणि शासकीय नोकरीचे वाढते आकर्षण अधोरेखित झाले आहे.
इंजिनिअर, एमबीए उमेदवारही शिपाई पदासाठी
या भरती प्रक्रियेत बी.ए., बी.कॉम., बी.एस्सी., एम.ए., एम.कॉम. यांच्यासह एमबीए आणि अभियांत्रिकी पदवीधरांनीही शिपाई पदासाठी अर्ज केल्याने बदलता रोजगार दृष्टिकोन स्पष्ट झाला आहे. उच्च शिक्षण घेऊनही सुरक्षित शासकीय सेवेला प्राधान्य दिले जात असल्याचे चित्र यामुळे समोर आले आहे.
खासगी क्षेत्रातील अनिश्चिततेचा परिणाम
खासगी क्षेत्रातील कंत्राटी पद्धत, मर्यादित वेतनवाढ, वाढलेले कामाचे तास आणि नोकरीतील अस्थिरता ही प्रमुख कारणे तरुणांना शासकीय सेवेकडे वळवताना दिसत आहेत. नोकरीची हमी, निवृत्तीवेतन, सामाजिक सन्मान आणि कुटुंबीयांची सुरक्षितता या बाबी पोलिस सेवेकडे आकर्षण वाढवणाऱ्या ठरत आहेत.
ग्रामीण भरतीतील शैक्षणिक चित्र
ग्रामीण पोलिस भरती प्रक्रियेत तब्बल १,२२१ उच्च पदवीधर सहभागी झाले आहेत. त्यामध्ये –
- बी.ई. – १५
- बी.टेक – १२
- एमबीए – १४
- बी. फार्मा – ९
- एम.एस्सी. – २७
- एलएलबी – २
- एम.कॉम – ४३
- बी.एस्सी. अॅग्री – २५
- बीबीए/बीसीएस – २०
- एम.ए. – २
- बी.एस्सी. – ३६३
- बी.कॉम – १३५
- बी.ए. – ५५४
वाढती स्पर्धा अधोरेखित
एवढ्या मोठ्या प्रमाणात उच्चशिक्षित उमेदवारांनी सहभाग नोंदवल्याने रोजगार बाजारातील स्पर्धेची तीव्रता स्पष्ट झाली आहे. बदलत्या आर्थिक वास्तवात सुरक्षित, स्थिर आणि प्रतिष्ठेची शासकीय नोकरी मिळवण्याकडे तरुणांचा वाढता कल हीच या भरती प्रक्रियेची सर्वात ठळक बाब ठरत आहे.
Leave a Comment