उमरा सर्कलमधील वीजपुरवठा, वन्य प्राण्यांचे हल्ले आणि अभियंत्यांच्या वर्तनावरून संतप्त झालेल्या शेतकरी व नागरिकांच्या प्रश्नांना ANN Akola News Network ने आवाज दिल्यानंतर प्रशासनाने तात्काळ दखल घेतली आहे. बातमी प्रसिद्ध होताच महावितरणने महत्त्वाचा निर्णय घेत उमरा 33 केव्ही फिडर अंतर्गत येणाऱ्या 11 केव्ही फीडर्सचा दिवसा वीजपुरवठा सुरू करण्याची घोषणा केली आहे.
महावितरणकडून मिळालेल्या माहितीनुसार, बुधवारपासून 33 केव्ही जितापूर सब-स्टेशनमधून निघणारे सर्व 11 केव्ही फीडर्स सकाळी 7.00 ते दुपारी 3.00 या वेळेत तीन फेजमध्ये सुरू राहणार आहेत. त्यामुळे रात्री शेतात जावे लागणाऱ्या शेतकऱ्यांना मोठा दिलासा मिळणार आहे.
याआधी उमरा सर्कलमधील शेतकरी व नागरिकांनी महावितरणच्या कारभाराविरोधात तीव्र नाराजी व्यक्त करत दिवसा वीजपुरवठा, सतत होणारी वीज खंडितता थांबवणे, तसेच शेतकऱ्यांशी अर्वाच्य वागणूक देणाऱ्या अभियंत्याची तात्काळ बदली करण्याची मागणी केली होती. रात्री वीजपुरवठ्यामुळे वन्य प्राण्यांच्या हल्ल्यांचा धोका वाढत असल्याने जीवित सुरक्षेचा गंभीर प्रश्न निर्माण झाला होता.
दरम्यान, मागण्या मान्य न झाल्यास आंदोलनाचा इशारा देण्यात आला होता. मात्र आता महावितरणच्या या निर्णयामुळे उमरा सर्कलमधील शेतकरी वर्गाला मोठा दिलासा मिळाल्याचं चित्र आहे. पुढील काळात वीजपुरवठा सुरळीत राहतो का, याकडे मात्र सर्वांचे लक्ष लागले आहे.
