जिल्हा परिषद निवडणूक प्रचारासाठी लातूरकडे निघालेल्या भाजप नेत्या पंकजा मुंडे यांच्या हेलिकॉप्टरमध्ये छत्रपती संभाजीनगर येथे तांत्रिक बिघाड झाल्याची घटना समोर आली आहे. सुदैवाने उड्डाण होण्यापूर्वीच ही अडचण लक्षात आल्यामुळे मोठा अनर्थ टळला.
मिळालेल्या माहितीनुसार, प्रचार दौऱ्याच्या नियोजनानुसार पंकजा मुंडे लातूरकडे रवाना होणार होत्या. मात्र छत्रपती संभाजीनगर विमानतळावर हेलिकॉप्टरची तपासणी सुरू असताना तांत्रिक त्रुटी आढळून आल्या. तात्काळ उड्डाण स्थगित करण्यात आले आणि सुरक्षेच्या दृष्टीने खबरदारी घेत हेलिकॉप्टर उडवण्यात आले नाही.
या घटनेनंतर प्रशासन आणि तांत्रिक पथकाने परिस्थितीची पाहणी केली. पंकजा मुंडे आता पर्यायी हेलिकॉप्टरने लातूरकडे रवाना होणार असल्याची माहिती देण्यात आली आहे. या प्रकारामुळे काही काळ कार्यक्रमांच्या वेळापत्रकात बदल होण्याची शक्यता आहे.
दरम्यान, उड्डाणाआधीच बिघाड लक्षात आल्याने मोठी दुर्घटना टळल्याने कार्यकर्ते आणि समर्थकांनी सुटकेचा निश्वास टाकला आहे. निवडणूक प्रचाराच्या धावपळीतही सुरक्षेच्या नियमांचे काटेकोर पालन आवश्यक असल्याचे या घटनेतून पुन्हा एकदा स्पष्ट झाले आहे.
Leave a Comment