अकोट : अखिल भारतीय छावा शिवभक्त मंडळ, रामटेक पुरा अकोट यांच्या वतीने दरवर्षीप्रमाणे यंदाही भव्य कावड उत्सवाचे आयोजन करण्यात आले आहे. या उत्सवाच्या नियोजनासाठी शनिवार, ८ ऑगस्ट रोजी संत रूपलाल महाराज मंगल कार्यालय येथे महत्त्वपूर्ण बैठक पार पडली.
कावड यात्रेचे नियोजन, आयोजनाची रूपरेषा तसेच उत्सव यशस्वी करण्यासाठी आवश्यक तयारी याबाबत बैठकीत सविस्तर चर्चा करण्यात आली. यावेळी मंडळाच्या कार्यकारिणीची निवड करण्यात आली असून सचिन नागपुरे यांची अध्यक्षपदी निवड करण्यात आली.
यासोबतच मंडळाच्या विविध पदांवर सदस्यांची निवड करण्यात आली. आगामी कावड उत्सव भक्तिमय आणि शिस्तबद्ध वातावरणात पार पाडण्यासाठी मंडळाच्या पदाधिकारी व सदस्यांनी एकजुटीने काम करण्याचा निर्धार व्यक्त केला.
दरवर्षी अकोट शहरात कावड उत्सवाला मोठ्या प्रमाणात शिवभक्तांची उपस्थिती लाभते. त्यामुळे यंदाच्या उत्सवासाठीही शिवभक्तांमध्ये उत्साहाचे वातावरण निर्माण झाले आहे. उत्सवाच्या पार्श्वभूमीवर कावड यात्रा, धार्मिक कार्यक्रम आणि अन्य नियोजन लवकरच अंतिम करण्यात येणार असल्याची माहिती मंडळाच्या वतीने देण्यात आली.
सचिन नागपुरे यांच्या नेतृत्वाखाली यंदाचा कावड उत्सव अधिक भव्य आणि भक्तिमय करण्यासाठी मंडळाच्या पदाधिकारी व सदस्यांकडून तयारीला सुरुवात झाली आहे.
Leave a Comment