अकोल्यात पुन्हा राजकीय महासंग्राम! पातूर नगरपरिषदेची रणधुमाळी सुरू; अकोटमध्येही स्थगित प्रभागासाठी निर्णायक मतदान

अकोला जिल्ह्यातील राजकारण पुन्हा एकदा तापण्याची चिन्हे दिसू लागली असून पातूर नगरपरिषद आणि अकोट नगरपरिषदेच्या निवडणुकांचा बहुप्रतीक्षित कार्यक्रम अखेर जाहीर करण्यात आला आहे. पातूर नगरपरिषदेची संपूर्ण सार्वत्रिक निवडणूक तर अकोट नगरपरिषदेतील एका प्रभागातील स्थगित निवडणूक यामुळे जिल्ह्यात राजकीय हालचालींना वेग आला आहे. राज्य निवडणूक आयोगाच्या घोषणेनंतर इच्छुक उमेदवारांनी मोर्चेबांधणी सुरू केली असून गल्लीपासून शहरापर्यंत राजकीय वातावरण चांगलेच तापले आहे.

❮ ❯

विशेष म्हणजे, अकोट नगरपरिषदेच्या प्रभाग क्रमांक ४ मधील निवडणूक उमेदवाराच्या निधनामुळे यापूर्वी स्थगित करण्यात आली होती. त्यामुळे या प्रभागातील राजकीय समीकरणे पुन्हा नव्याने जुळवावी लागणार आहेत. दुसरीकडे पातूर नगरपरिषदेची प्रभाग रचना वेळेत पूर्ण न झाल्याने संपूर्ण नगरपरिषदेची निवडणूक नव्याने जाहीर करण्याची वेळ आली. त्यामुळे आता दोन्ही ठिकाणी राजकीय पक्ष आणि इच्छुक उमेदवारांसाठी ही प्रतिष्ठेची लढाई ठरणार आहे.

महाराष्ट्र नगरपरिषदा, नगर पंचायती व औद्योगिक नगरी अधिनियम १९६५ मधील कलम १०अ पोटकलम (४) अंतर्गत अधिकारांचा वापर करून हा निवडणूक कार्यक्रम जाहीर करण्यात आला आहे. यासोबतच राज्यातील इतर ३ नगरपरिषदांमधील रिक्त पदांसाठी पोटनिवडणुकीचाही कार्यक्रम जाहीर करण्यात आला आहे.

निवडणूक कार्यक्रम असा

• जिल्हाधिकाऱ्यांकडून निवडणूक कार्यक्रम जाहीर : १२ मे २०२६
• नामनिर्देशनपत्र स्वीकृती कालावधी : १८ मे ते २५ मे २०२६
  (सकाळी ११ ते दुपारी ३ वाजेपर्यंत)
• २३ मे आणि २४ मे रोजी सुट्टीमुळे अर्ज स्वीकृती बंद
• अंतिम उमेदवार यादी व चिन्ह वाटप : २ जून २०२६
• मतदान : २० जून २०२६, सकाळी ७.३० वाजल्यापासून
• मतमोजणी व निकाल : २१ जून २०२६ (रविवार)

या निवडणुकीकडे संपूर्ण जिल्ह्याचे लक्ष लागले असून अनेक दिग्गज नेत्यांची प्रतिष्ठा पणाला लागणार आहे. स्थानिक पातळीवर विकासकामे, गटबाजी, नाराज कार्यकर्ते आणि नव्या चेहऱ्यांची एन्ट्री यामुळे निवडणूक अधिक रंगतदार होण्याची शक्यता आहे. विशेषतः पातूरमध्ये सत्तांतर होणार का, आणि अकोटमध्ये कोणता गट बाजी मारणार याची उत्सुकता शिगेला पोहोचली आहे.

राजकीय पक्षांनी आतापासूनच रणनीती आखण्यास सुरुवात केली असून शहरांमध्ये बैठका, प्रचारयोजना आणि संभाव्य उमेदवारांच्या नावांची चर्चा रंगू लागली आहे. आगामी काही दिवसांत अकोला जिल्ह्याचे राजकारण आणखी तापणार हे निश्चित मानले जात आहे.