मूर्तिजापूर तालुक्यातील माना पोलीस स्टेशन हद्दीतील एका गावातील बेपत्ता झालेल्या तरुणीचा अखेर शोध लागल्याने कुटुंबीयांसह परिसराने सुटकेचा निःश्वास टाकला आहे. १३ फेब्रुवारी २०२६ रोजी तरुणी बेपत्ता झाल्याची तक्रार माना पोलीस स्टेशनमध्ये दाखल झाली होती. या घटनेनंतर कुटुंबीय आणि गावात चिंतेचे वातावरण निर्माण झाले होते.
प्रकरणाचे गांभीर्य लक्षात घेऊन ठाणेदार गणेश नावकार यांच्या मार्गदर्शनाखाली ‘ऑपरेशन शोध’ मोहीम सुरू करण्यात आली. पोलिसांनी तांत्रिक माहिती, स्थानिक माहितीदार आणि विविध संपर्कांच्या माध्यमातून तपासाची चक्रे वेगाने फिरवली. विशेष म्हणजे, संबंधित तरुण व तरुणी यांनी मोबाईल फोन बंद ठेवले असल्याने शोधमोहीम अधिक कठीण झाली होती.
तरीदेखील पोलिसांनी हार न मानता सातारा, नागपूर आणि भंडारा येथे सातत्याने शोधमोहीम राबवली आणि अखेर तरुणी भंडारा येथे एका आंतरजातीय तरुणासोबत असल्याचे निष्पन्न झाले. पोलिसांनी तत्काळ कारवाई करत दोघांना ताब्यात घेतले.
यानंतर समुपदेशन करून कोणताही वाद निर्माण न होऊ देता तरुणीला तिच्या आई-वडिलांच्या स्वाधीन करण्यात आले, तर संबंधित युवकालाही समज देण्यात आली.
माना पोलिसांच्या या संवेदनशील आणि संयमी कारवाईचे सर्वत्र कौतुक होत असून, “ऑपरेशन शोध” मोहीम यशस्वी ठरली आहे.
Leave a Comment