अकोला जिल्ह्यात लाचखोरीचा धक्कादायक प्रकार उघडकीस आला असून लाचलुचपत प्रतिबंधक विभागाने (ACB) दोन पोलीस कर्मचाऱ्यांना ताब्यात घेतले आहे. अवैध दारू विक्री सुरू ठेवण्यासाठी पैशांची मागणी केल्याचा आरोप संबंधित पोलिसांवर करण्यात आला आहे. या कारवाईमुळे पोलीस विभागात एकच खळबळ उडाली आहे.
मिळालेल्या माहितीनुसार, मूर्तिजापूर ग्रामीण पोलीस ठाण्याच्या हद्दीतील ग्राम अनभोरा येथे हा प्रकार घडला. येथे अवैध दारू विक्री सुरू ठेवण्यासाठी संबंधित बीट जमादार कानडे आणि रायटर ज्ञानेश्वर रडके यांनी तक्रारदाराकडे तीन हजार रुपयांची लाच मागितल्याचा आरोप आहे.
या संदर्भात तक्रारदाराने अकोला लाचलुचपत प्रतिबंधक विभागाकडे तक्रार दाखल केली होती. एसीबी पथकाने तक्रारीची पडताळणी केली असता दोन्ही कर्मचाऱ्यांनी तीन हजार रुपयांची मागणी केल्याचे निष्पन्न झाले. दरम्यान नंतर हा व्यवहार दोन हजार रुपयांवर ठरल्याची माहिती समोर आली.
एसीबी पथक आरोपींना रंगेहात पकडण्याच्या तयारीत असताना कारवाईची चाहूल लागल्याने संबंधित आरोपी पैसे स्वीकारण्यास टाळाटाळ करत असल्याचे दिसून आले. यानंतर एसीबीचे पोलीस उपअधीक्षक मिलिंद बाहकर यांच्या मार्गदर्शनाखाली पोलीस निरीक्षक इंगळे यांच्या पथकाने कारवाई करत दोन्ही कर्मचाऱ्यांना ताब्यात घेतले.
या कारवाईमुळे पोलीस विभागात खळबळ उडाली असून या प्रकरणाचा पुढील तपास लाचलुचपत प्रतिबंधक विभागाकडून सुरू आहे.
