छत्रपती संभाजीनगर जिल्ह्यातील पैठण तालुक्यातील पाचोड येथील मतदान केंद्रावर धक्कादायक प्रकार समोर आल्याने निवडणूक व्यवस्थेवर गंभीर प्रश्नचिन्ह निर्माण झाले आहे. शिंदेसेनेचे नेते संदीपान भुमरे यांचे नातेवाईक असलेल्या विलास भुमरे यांच्या अल्पवयीन मुलाने चक्क मतदान केल्याचा आरोप पुढे आला आहे.
या घटनेची माहिती समोर येताच स्थानिक राजकीय वर्तुळात खळबळ उडाली असून मतदान केंद्रावरील पडताळणी यंत्रणा कितपत सक्षम होती, याबाबत चर्चा सुरू झाली आहे. अल्पवयीन मुलाकडून मतदान कसे झाले? ओळख पडताळणी प्रक्रिया व्यवस्थित पार पडली का? अशा अनेक प्रश्नांची उकल अद्याप व्हायची आहे.
घटनेशी संबंधित व्हिडिओ व छायाचित्रे सोशल मीडियावर व्हायरल झाल्यानंतर प्रकरण अधिकच गाजू लागले. निवडणूक प्रक्रियेतील पारदर्शकतेवर यामुळे शंका उपस्थित होत असून प्रशासनाने तातडीने चौकशी करावी, अशी मागणी होत आहे.
दरम्यान, निवडणूक नियमांनुसार अल्पवयीन व्यक्तीस मतदानाचा अधिकार नसताना असा प्रकार घडणे ही गंभीर बाब मानली जात आहे. संबंधित मतदान केंद्रावरील अधिकारी-कर्मचाऱ्यांची जबाबदारी निश्चित करून दोषींवर कठोर कारवाई करावी, अशी मागणी राजकीय पक्ष व नागरिकांकडून होत आहे.
या प्रकरणी निवडणूक विभागाकडून अधिकृत भूमिका अद्याप स्पष्ट झालेली नसली तरी चौकशीचे संकेत मिळत आहेत. पुढील तपासानंतर नेमका प्रकार काय घडला, याचे सत्य समोर येणार आहे.
