अकोला जिल्ह्यात पोलीस अधीक्षक अर्चित चांडक यांच्या मार्गदर्शनाखाली सुरू असलेल्या ‘ऑपरेशन प्रहार’ अंतर्गत स्थानिक गुन्हे शाखेने मोठी कारवाई करत गोवंश कत्तलीचा गंभीर प्रकार उघडकीस आणला आहे.
खात्रीलायक गुप्त माहितीच्या आधारे API विजय चव्हाण, पोलीस उपनिरीक्षक विष्णु बोडखे, माजिद खान पठाण व पथकाने पोळा चौक परिसरात पेट्रोलिंगदरम्यान दहीहांडा वेस, खिडकी पुरा येथे छापा टाकला. या छाप्यात 25 गोवंश जातीची जनावरे अत्यंत दयनीय, जखमी व अशक्त अवस्थेत आढळून आली. जनावरांना पाणी व चाऱ्याची कोणतीही व्यवस्था नव्हती आणि ती कत्तलीसाठी निर्दयतेने बांधून ठेवण्यात आल्याचे निष्पन्न झाले.
जप्त जनावरांची अंदाजे किंमत 6 लाख 15 हजार रुपये इतकी असून पंचनामा करून त्यांना आदर्श गोसेवा केंद्र, म्हैसपूर येथे उपचार व देखरेखीकरिता सुपूर्द करण्यात आले आहे.
या प्रकरणी शेख सद्दाम शेख मेहबुब व मोबिन कुरेशी मोहसीन कुरेशी हे आरोपी फरार असून त्यांच्याविरोधात महाराष्ट्र प्राणी संरक्षण कायदा 1995, प्राण्यांना निर्दयतेने वागणूक प्रतिबंध कायदा 1960 आणि भारतीय न्याय संहिता कलम 329 अंतर्गत गुन्हा दाखल करण्यात आला आहे.
अकोल्यातील गुन्हेगारीविरोधातील कारवाईत ऑपरेशन प्रहार पुन्हा एकदा प्रभावी ठरत असल्याचे या घटनेतून स्पष्ट झाले आहे.
Leave a Comment