बाळापुर ते वाडेगाव मार्गावर सब स्टेशनजवळ एका बिबट्याला भरधाव ट्रकने उडवल्याची धक्कादायक घटना समोर आली आहे. या भीषण अपघातात बिबट्याचा जागीच मृत्यू झाला. सकाळच्या सुमारास ही घटना घडली असून रस्त्यावर रक्ताचे डाग आणि मृत बिबट्याचे शरीर पाहून नागरिकांमध्ये भीतीचे वातावरण पसरले.
घटनेची माहिती मिळताच वनविभागाचे अधिकारी व कर्मचारी घटनास्थळी दाखल झाले. मृत बिबट्याचा पंचनामा करून पुढील कायदेशीर प्रक्रिया सुरू करण्यात आली आहे. प्राथमिक माहितीनुसार, अन्नाच्या शोधात किंवा जंगलाकडून रस्ता ओलांडताना हा अपघात झाल्याचा अंदाज व्यक्त केला जात आहे.
या परिसरात यापूर्वीही वन्यप्राण्यांच्या हालचाली वाढल्याचे स्थानिक नागरिक सांगत आहेत. त्यामुळे रात्रीच्या वेळी वाहनचालकांनी वेग मर्यादेत ठेवून सावधगिरी बाळगावी, असे आवाहन प्रशासनाकडून करण्यात आले आहे.
या घटनेमुळे पुन्हा एकदा वन्यजीव संरक्षण आणि रस्त्यावरील सुरक्षिततेचा प्रश्न ऐरणीवर आला असून, संबंधित विभागांनी तातडीने उपाययोजना कराव्यात, अशी मागणी नागरिकांकडून होत आहे.
