राष्ट्रीय महामार्गावर मुर्तिजापूर ग्रामीण पोलीस ठाण्याच्या हद्दीत अनभोरा बस थांब्याजवळ रविवारी (१ फेब्रुवारी) सकाळच्या सुमारास भीषण अपघात झाला. भरधाव कार दुभाजकावर आदळून रस्त्याच्या कडेला उलटल्याने या अपघातात चार ते पाच प्रवासी जखमी झाल्याची माहिती समोर आली आहे.
सूत्रांनी दिलेल्या माहितीनुसार, बोरगाव मंजू येथून मुर्तिजापूरकडे जाणारी कार क्रमांक MH 28 CC 5851 ही राष्ट्रीय महामार्गावर वेगात धावत होती. अनभोरा बस थांब्याजवळ चालकाचे वाहनावरील नियंत्रण सुटले आणि कार थेट दुभाजकावर धडकली. धडकेनंतर कार रस्त्याच्या कडेला पलटली. या घटनेमुळे परिसरात एकच खळबळ उडाली.
अपघाताची माहिती मिळताच वीर भगतसिंह आपत्कालीन पथक तसेच स्थानिक नागरिकांनी तत्काळ मदतीसाठी धाव घेतली. जखमी प्रवाशांना तातडीने मुर्तिजापूर येथील सामान्य रुग्णालयात उपचारासाठी दाखल करण्यात आले. सुदैवाने कोणतीही जीवितहानी झाली नसली तरी काही प्रवाशांना गंभीर दुखापत झाल्याचे सांगण्यात येत आहे.
दरम्यान, अपघात नेमका कशामुळे झाला याबाबत अद्याप स्पष्ट माहिती समोर आलेली नाही. पोलिसांकडून घटनास्थळी पंचनामा करून अधिक तपास सुरू आहे. या अपघातामुळे काही काळ महामार्गावरील वाहतूकही विस्कळीत झाली होती.
सतत वाढणाऱ्या अपघातांच्या पार्श्वभूमीवर राष्ट्रीय महामार्गावर वेग मर्यादेचे पालन, वाहनांची नियमित तपासणी आणि सावध वाहनचालना याकडे विशेष लक्ष देण्याची गरज पुन्हा एकदा अधोरेखित झाली आहे. स्थानिक प्रशासनाकडून या भागात सुरक्षा उपाय वाढवण्याची मागणीही नागरिकांकडून होत आहे.
