अकोला महानगरपालिका निवडणुकीसाठी आज मतदान प्रक्रिया शांततेत पार पडली. निवडणूक आयोगाच्या नियमांनुसार सायंकाळी ठीक ५.३० वाजता मतदानाची वेळ संपल्यानंतर मतदान केंद्रात नव्या मतदारांना आत घेण्यास बंदी घालण्यात आली. वेळेत मतदान केंद्रावर उपस्थित असलेल्या मतदारांनाच मतदानाची परवानगी देण्यात आली.
नियोजित वेळ संपताच सर्व मतदान केंद्रांवरील प्रवेशद्वारे बंद करण्यात आले. यामुळे उशिरा आलेल्या काही मतदारांमध्ये नाराजी दिसून आली. मात्र नियमांनुसार मतदान प्रक्रिया काटेकोरपणे राबवण्यात आली, अशी माहिती निवडणूक अधिकाऱ्यांनी दिली.
मतदान प्रक्रिया सुरळीत पार पाडण्यासाठी प्रशासनाने मोठ्या प्रमाणावर नियोजन केले होते. पोलीस बंदोबस्त, मतदान कर्मचाऱ्यांची उपस्थिती आणि ईव्हीएम सुरक्षेची योग्य व्यवस्था करण्यात आली होती. अनेक मतदान केंद्रांवर सकाळपासूनच मतदारांची गर्दी पाहायला मिळाली.
अकोला महानगरपालिका निवडणुकीतील उमेदवारांचे भवितव्य आता ईव्हीएममध्ये बंद झाले असून, उद्या सकाळी मतमोजणी होणार आहे. निकालाकडे संपूर्ण अकोला शहराचे लक्ष लागले असून, शहराच्या पुढील कारभाराचा निर्णय या निकालातून स्पष्ट होणार आहे.
Leave a Comment