रक्षाबंधनाचा आनंद साजरा होत असतानाच बुलढाणा जिल्ह्यातील संग्रामपूर तालुक्यातून काळजाचा ठोका चुकवणारी घटना समोर आली आहे. टूनकी–लाडणापूर मार्गावरील दूध डेअरीसमोर भरधाव बोलेरो वाहनाने दुचाकीला जोरदार धडक दिल्याने एका चिमुकल्याचा दुर्दैवी मृत्यू झाला. या भीषण अपघातात चिमुकल्याची आई आणि अन्य एक व्यक्ती गंभीर जखमी झाल्याची माहिती आहे.
मिळालेल्या माहितीनुसार, एकाच कुटुंबातील सदस्य दुचाकीवरून प्रवास करत होते. याचवेळी समोरून आलेल्या बोलेरो वाहनाने दुचाकीला जोरदार धडक दिली. धडक इतकी भीषण होती की, दुचाकीवरील प्रवासी रस्त्यावर दूर फेकले गेले.
अपघातानंतर घटनास्थळी एकच खळबळ उडाली. स्थानिक नागरिकांनी तातडीने मदतकार्य सुरू करत जखमींना उपचारासाठी जवळच्या रुग्णालयात दाखल केले. चिमुकल्याचा मृत्यू झाल्याने कुटुंबावर रक्षाबंधनाच्या दिवशीच दुःखाचा डोंगर कोसळला आहे. गंभीर जखमींवर रुग्णालयात उपचार सुरू असल्याची माहिती आहे.
या भीषण अपघातामुळे टूनकी–लाडणापूर मार्गावरील वाहतुकीच्या सुरक्षिततेचा प्रश्न पुन्हा ऐरणीवर आला आहे. अपघात नेमका कसा घडला, बोलेरोचा वेग किती होता आणि या प्रकरणी पोलिसांकडून काय कारवाई करण्यात आली, याबाबत अधिकृत माहितीची प्रतीक्षा आहे.रक्षाबंधनाच्या दिवशीच काळाचा घाला; एका चिमुकल्याचा जीव गेला आणि कुटुंबाचा आनंद क्षणात दुःखात बदलला.
Leave a Comment