अकोला जिल्ह्यातील हिवरखेड नगरपालिकेत महायुतीतील अंतर्गत वाद पुन्हा एकदा चव्हाट्यावर आला आहे. नगरपालिकेच्या सर्वसाधारण सभेत विषय पत्रिकेसोबत टिपणी जोडण्याच्या मुद्द्यावरून भाजप आणि शिवसेना शिंदे गटाचे नगरसेवक आमनेसामने आले. पाहता पाहता वादाचे रूपांतर हाणामारीत झाले आणि सभागृहासह सभागृहाबाहेरही जोरदार राडा झाल्याची माहिती आहे.
या घटनेत शिवसेना शिंदे गटाचे गटनेते रवी घुंगड आणि नगरसेवक ऋषिकेश पंचबुद्धे जखमी झाल्याचे सांगण्यात येत आहे. भाजप कार्यकर्त्यांकडून मारहाण झाल्याचा आरोप शिंदे गटाकडून करण्यात आला आहे. नगराध्यक्ष सुलभा दुतोंडे यांच्या पती आणि मुलांनी गुंडांकरवी मारहाण केल्याचा गंभीर आरोप रवी घुंगड यांनी केला आहे. मात्र, या आरोपांची स्वतंत्र पुष्टी झालेली नाही.
घटनेनंतर हिवरखेडमध्ये वातावरण चांगलेच तापले असून, भाजप आणि शिंदेसेनेचे कार्यकर्ते समोरासमोर आल्याने तणाव निर्माण झाला आहे. परिस्थिती नियंत्रणात ठेवण्यासाठी पोलिसांचा मोठा बंदोबस्त तैनात करण्यात आला आहे. सध्या शहरात तणावपूर्ण शांतता आहे. या हाणामारीचा व्हिडीओही सोशल मीडियावर व्हायरल होत आहे.
विशेष म्हणजे, हिवरखेड नगरपालिकेवर भाजपची एकहाती सत्ता आहे. डिसेंबर 2025 मध्ये झालेल्या निवडणुकीत भाजपने मोठे यश मिळवत नगराध्यक्षपदही आपल्या ताब्यात घेतले. अनुभवी नेत्या सुलभा दुतोंडे यांची नगराध्यक्षपदी निवड झाली. मात्र, त्यानंतर गेल्या काही दिवसांपासून भाजप आणि शिवसेना शिंदे गटामध्ये स्थानिक पातळीवर मतभेद असल्याचे चित्र समोर येत होते.आता थेट सर्वसाधारण सभेतच दोन्ही पक्षांचे कार्यकर्ते आणि नगरसेवक भिडल्याने महायुतीतील स्थानिक पातळीवरील अंतर्गत संघर्ष पुन्हा ऐरणीवर आला आहे.
गल्लीपासून दिल्लीपर्यंत भाजप आणि शिंदेसेनेची युती असली, तरी हिवरखेडमधील या घटनेने स्थानिक पातळीवर मनोमिलनाचा अभाव आहे का? असा सवाल उपस्थित केला आहे. या प्रकरणाची वरिष्ठ नेतेमंडळी कितपत दखल घेतात आणि स्थानिक वादावर तोडगा काढण्यासाठी काय भूमिका घेतली जाते, याकडे आता अकोला जिल्ह्याचे लक्ष लागले आहे.
Leave a Comment