अकोट बसस्थानक हे शहरासह ग्रामीण भागातील नागरिकांसाठी दळणवळणाचे महत्त्वाचे केंद्र आहे. दररोज मोठ्या संख्येने विद्यार्थी, महिला, ज्येष्ठ नागरिक, शेतकरी, कामगार तसेच विविध कामानिमित्त प्रवास करणारे नागरिक या बसस्थानकाचा वापर करतात. मात्र अनेकदा बसचा मार्ग किंवा गंतव्यस्थान स्पष्टपणे दिसत नसल्याने प्रवाशांची धावपळ होते. ही अडचण लक्षात घेऊन लोकजागर मंचने प्रवाशांना अधिक सुविधा मिळावी, या सामाजिक भावनेतून बस नामफलक देण्याचा उपक्रम राबविला. नामफलकांमुळे बसची ओळख स्पष्ट होऊन प्रवाशांना योग्य बस निवडणे सोपे होणार आहे. विशेषतः बाहेरगावाहून येणारे प्रवासी, महिला आणि ज्येष्ठ नागरिकांसाठी ही सुविधा उपयुक्त ठरणार आहे.
सार्वजनिक वाहतूक व्यवस्था अधिक प्रवासीस्नेही आणि सुसूत्र करण्याच्या दृष्टीने हा छोटासा, मात्र महत्त्वपूर्ण उपक्रम मानला जात आहे. प्रवाशांच्या दैनंदिन अडचणी कमी करण्यासाठी सामाजिक संस्थांनी पुढाकार घेणे गरजेचे असल्याचे यावेळी उपस्थितांनी नमूद केले.
यावेळी अकोट आगार व्यवस्थापक मिथुन शर्मा उपस्थित होते. लोकजागर मंचच्या या सामाजिक उपक्रमाबद्दल उपस्थितांनी समाधान व्यक्त केले. सार्वजनिक वाहतूक व्यवस्था ही सर्वसामान्य नागरिकांच्या दैनंदिन जीवनाचा महत्त्वाचा भाग असल्याने प्रवाशांच्या समस्या सोडविण्यासाठी प्रशासनासोबतच सामाजिक संस्थांची भूमिकाही महत्त्वाची असल्याचे यावेळी अधोरेखित करण्यात आले.
लोकजागर मंचच्या माध्यमातून केवळ सामाजिक प्रश्नांकडे लक्ष वेधण्याऐवजी प्रत्यक्ष कृतीतून नागरिकांना सुविधा उपलब्ध करून देण्याचा प्रयत्न केला जात आहे. अकोट बसस्थानकासाठी नामफलक उपलब्ध करून देण्याचा हा उपक्रम त्याच सामाजिक बांधिलकीचे उदाहरण ठरला आहे.प्रवाशांच्या अडचणी समजून घेऊन त्यावर शक्य त्या पद्धतीने सकारात्मक उपाययोजना करण्यासाठी लोकजागर मंच भविष्यातही विविध सामाजिक उपक्रम राबविणार असल्याचे संस्थापक अनिल गावंडे यांनी सांगितले.
या उपक्रमावेळी लोकजागर मंचचे अनंतराव सपकाळ, गजाननभाऊ बोरोकार, राजूभाऊ गावंडे, सचिनभाऊ नागापुरे, योगेश जायले, अविनाश बघेले, ओम पाचपोहे, संजय शेळके, हरिभाऊ कुकडे, विनोद शित्रे आदी उपस्थित होते.
प्रवाशांच्या सुविधेसाठी राबविण्यात आलेल्या या उपक्रमाचे अकोट शहरातील नागरिक व प्रवाशांकडून स्वागत होत असून, सार्वजनिक सुविधांच्या विकासासाठी सामाजिक संस्थांनी पुढाकार घ्यावा, अशी अपेक्षा व्यक्त होत आहे.
Leave a Comment