अकोट तालुक्यात गोवंश तस्करीविरोधात पोलिसांनी मोठी कारवाई करत बोलेरो पिकअपसह तब्बल ५,०४,२५० रुपयांचा मुद्देमाल जप्त केला आहे. या कारवाईमुळे परिसरात खळबळ उडाली असून बेकायदेशीर कत्तलीच्या प्रकारांवर मोठा आळा बसण्याची शक्यता आहे.
मिळालेल्या माहितीनुसार, पोलिसांना गुप्त बातमीदाराकडून माहिती मिळाली होती की, अकोलखेड येथून मोहाळा गावाकडे एका पांढऱ्या बोलेरो पिकअप वाहनातून गोवंश जनावरे कत्तलीसाठी नेली जात आहेत. या माहितीच्या आधारे पोलिसांनी अकोलखेड-मोहाळा मार्गावरील खर्डा परिसरात सापळा रचला.
यावेळी पोलिसांनी पाहणी केली असता, संशयित बोलेरो पिकअपमधून गोवंश जनावरे उतरवली जात असल्याचे आढळले. पोलिसांना पाहताच चालक घटनास्थळावरून फरार झाला. मात्र, पोलिसांनी तत्परता दाखवत शेख मुस्ताक शेख मुक्तार (वय २५, रा. मोहाळा) याला घटनास्थळी पकडले.
चौकशीदरम्यान आरोपीने ही जनावरे अब्दुल आरिफ अब्दुल गफार (रा. नंदीपेठ, अकोट) याची असल्याचे सांगितले. पोलिसांनी घटनास्थळावरून ४० किलो गोमांस, कत्तलीसाठी वापरण्यात येणारी शस्त्रे, तसेच ५ गोवंश जातीचे बैल जप्त केले.
याशिवाय, बोलेरो पिकअप (एमएच ३० एबी ४१७३) देखील जप्त करण्यात आली. एकूण ५ लाखांहून अधिक किमतीचा मुद्देमाल पोलिसांच्या ताब्यात घेण्यात आला आहे.
या प्रकरणी आरोपींविरुद्ध गुन्हा दाखल करण्यात आला असून पुढील तपास सुरू आहे. ही कारवाई पोलीस अधीक्षक अर्चित चांडक, अपर पोलीस अधीक्षक बी. चंद्रकांत रेड्डी आणि सहाय्यक पोलीस अधीक्षक निखील पाटील यांच्या मार्गदर्शनाखाली, अकोट ग्रामीण पोलीस स्टेशनचे ठाणेदार किशोर जुनघरे यांच्या पथकाने केली.
या धाडसी कारवाईमुळे अकोट परिसरात सुरू असलेल्या गोवंश तस्करीच्या जाळ्यावर मोठा आघात बसल्याचे मानले जात आहे.
Leave a Comment