शहरातील ५२ गेट परिसरात एक धक्कादायक घटना समोर आली असून गेल्या दोन महिन्यांपासून बेपत्ता असलेले संजय तुळशीराम कोकाटे (वय ५५) यांचा कुजलेल्या अवस्थेतील मृतदेह आढळून आल्याने परिसरात मोठी खळबळ उडाली आहे. गाडेकर लेआऊट लगत असलेल्या मोकळ्या जागेतील सांडपाण्याच्या गटारात हा मृतदेह आढळून आला.
मिळालेल्या माहितीनुसार, गाडेकर लेआऊट परिसरातील एका रहिवाशाला साफसफाई करत असताना तीव्र दुर्गंधी जाणवली. संशय आल्याने त्यांनी आजूबाजूला पाहणी केली असता गटारात कुजलेल्या अवस्थेतील मृतदेह दिसून आला. घटनेची गंभीरता लक्षात घेत त्यांनी तात्काळ पोलिसांना माहिती दिली.
माहिती मिळताच मूर्तिजापूर शहर पोलिसांनी घटनास्थळी धाव घेत पंचनामा केला. मृतदेह ताब्यात घेऊन शवविच्छेदनासाठी पाठविण्यात आला. प्राथमिक तपासात हा मृतदेह संजय तुळशीराम कोकाटे यांचाच असल्याचे स्पष्ट झाले. ते मागील दोन महिन्यांपासून बेपत्ता असल्याची नोंद पोलिस ठाण्यात होती.
दरम्यान, मृत्यूचे नेमके कारण अद्याप स्पष्ट झाले नसून घातपाताचा संशय आहे का, यासह सर्व शक्यतांचा तपास पोलिसांकडून केला जात आहे. ठाणेदार अजित जाधव यांच्या मार्गदर्शनाखाली पुढील तपास सुरू असून या घटनेमुळे शहरात भीती व चर्चेचे वातावरण निर्माण झाले आहे.
Leave a Comment