डाबकी रोड पोलीस ठाण्याने अवघ्या तीन महिन्यांत गुन्हेगारीवर जोरदार प्रहार करत मोठे यश मिळवले आहे. चोरी, चेन स्नॅचिंग, खून आणि बेकायदेशीर चायनीज मांजा विक्रीसारख्या गंभीर गुन्ह्यांचा पर्दाफाश करत पोलिसांनी कोट्यवधी रुपयांचा सोन्या-चांदीचा मुद्देमाल, रोख रक्कम, वाहने आणि इतर साहित्य जप्त केले आहे. या कारवाईमुळे गुन्हेगारांमध्ये खळबळ उडाली असून नागरिकांमध्ये सुरक्षिततेचा विश्वास वाढला आहे.
घरफोडी प्रकरणांचा जलद उलगडा
१७ ऑक्टोबर २०२५ रोजी बालाजी नगर येथील घरफोडी प्रकरणात पोलिसांनी अवघ्या काही आठवड्यांत आरोपीला अटक करत ७०.९३० ग्रॅम सोन्याचे दागिने (किंमत सुमारे ₹५.३२ लाख) जप्त केले. त्यानंतर १८ नोव्हेंबर २०२५ रोजी मेहरे नगरमधील घरफोडी प्रकरणाचा १२ तासांत उलगडा करत १७३.३३० ग्रॅम सोने, १८.६०० ग्रॅम चांदी आणि रोख रक्कम असा एकूण ₹२१.७५ लाखांचा मुद्देमाल हस्तगत करण्यात आला.
खून प्रकरणाचा पर्दाफाश
२३ ऑक्टोबर २०२५ रोजी दाखल मिसिंग प्रकरणाचा तपास करताना युवकाचा खून झाल्याचे उघड झाले. या प्रकरणात मुख्य आरोपींसह दोन जणांना अटक करून खुनाचा गुन्हा दाखल करण्यात आला.
चायनीज मांजा आणि चेन स्नॅचिंगवर कारवाई
६ डिसेंबर २०२५ रोजी बेकायदेशीर चायनीज मांजा विक्रीविरोधात छापा टाकून ₹१ लाखांचा मुद्देमाल जप्त करण्यात आला. तसेच जानेवारी २०२६ मध्ये आंतरराज्यीय चेन स्नॅचिंग टोळीचा पर्दाफाश करत मध्यप्रदेशातील पाच आरोपींना अटक करून ₹१८.३६ लाखांचा मुद्देमाल हस्तगत करण्यात आला.
नेतृत्वात ठोस परिणाम
ही संपूर्ण कारवाई पोलीस अधीक्षक अर्चित चांडक, अपर पोलीस अधीक्षक बी. चंद्रकांत रेड्डी आणि उपविभागीय अधिकारी सुदर्शन पाटील यांच्या मार्गदर्शनाखाली वरिष्ठ पोलीस निरीक्षक दीपक कोळी यांच्या नेतृत्वात पार पडली. विशेष म्हणजे, दीपक कोळी यांनी कार्यभार स्वीकारल्यानंतर अवघ्या तीन महिन्यांतच ही उल्लेखनीय कामगिरी साध्य केली आहे.
डाबकी रोड पोलिसांच्या या धडाकेबाज कारवाईमुळे अकोला शहरातील गुन्हेगारीवर मोठा आघात झाला असून नागरिकांनी पोलिसांच्या कामगिरीचे कौतुक केले आहे.
Leave a Comment