महापालिका निवडणुकीच्या पार्श्वभूमीवर मतदारांसाठी दिलासादायक आणि महत्त्वाची माहिती समोर आली आहे. मतदानाच्या दिवशी मतदारांकडे छायाचित्र असलेले मतदार ओळखपत्र (EPIC कार्ड) नसले, तरीही मतदानाचा हक्क बजावता येणार आहे. राज्य निवडणूक आयोगाने यासाठी पर्यायी ओळखीचे १२ वैध पुरावे निश्चित केले असून, त्यापैकी कोणताही एक पुरावा दाखविल्यानंतर मतदारांना मतदान करता येणार आहे.
१५ जानेवारी रोजी सकाळी ७.३० ते सायंकाळी ५.३० वाजेपर्यंत महापालिका निवडणुकीसाठी मतदान होणार आहे. या प्रक्रियेत प्रत्येक पात्र मतदाराने मतदान केंद्रावर स्वतःची ओळख पटवणे आवश्यक आहे. छायाचित्र असलेले मतदार ओळखपत्र हा प्राथमिक पुरावा असला, तरी ते उपलब्ध नसल्यामुळे कोणाचाही मतदानाचा अधिकार हिरावून घेतला जाणार नाही, असे स्पष्ट करण्यात आले आहे.
राज्य निवडणूक आयोगाच्या निर्देशानुसार, मतदार ओळखपत्र नसलेल्या नागरिकांनी खालीलपैकी कोणताही एक वैध छायाचित्र असलेला पुरावा सादर केल्यास मतदान करता येईल.
यामध्ये पासपोर्ट, आधार ओळखपत्र, वाहन चालविण्याचा परवाना, पॅन कार्ड, केंद्र किंवा राज्य शासन तसेच स्थानिक स्वराज्य संस्थांनी दिलेले छायाचित्रयुक्त कर्मचारी ओळखपत्र, राष्ट्रीयीकृत बँक किंवा टपाल खात्याचे फोटो असलेले पासबुक, सक्षम प्राधिकाऱ्याने दिलेला दिव्यांग दाखला, मनरेगा जॉब कार्ड, निवृत्त कर्मचाऱ्यांचे किंवा त्यांच्या विधवा व अवलंबितांचे छायाचित्रयुक्त निवृत्तीवेतन कागदपत्र, लोकसभा–विधानसभा सचिवालयाचे अधिकृत ओळखपत्र, स्वातंत्र्यसैनिकांचे फोटो ओळखपत्र आणि केंद्र शासनाच्या श्रम मंत्रालयाने दिलेले आरोग्य विमा योजनेचे कार्ड यांचा समावेश आहे.
लोकशाही प्रक्रियेत मतदान हा प्रत्येक नागरिकाचा मूलभूत अधिकार आहे. त्यामुळे कोणताही पात्र मतदार ओळखपत्राच्या अभावामुळे मतदानापासून वंचित राहू नये, हा आयोगाचा उद्देश आहे. नागरिकांनी उपलब्ध ओळखपत्रासह मतदान केंद्रावर जाऊन आपला हक्क बजावावा, असे आवाहन निवडणूक प्रशासनाकडून करण्यात आले आहे.
