चारित्र्याच्या संशयाचा भयानक शेवट… संशयाने माणुसकीला हरवून टाकलं आणि एका कुटुंबाचं संपूर्ण आयुष्य उद्ध्वस्त झालं. बुलढाणा जिल्ह्यात पत्नी आणि चार वर्षांच्या निरागस मुलाच्या कुऱ्हाडीने केलेल्या निर्घृण हत्येने समाजमन हादरून गेलं आहे.
बुलढाणा जिल्ह्यात चारित्र्याच्या संशयातून पत्नी आणि चार वर्षांच्या चिमुकल्याची निर्घृण हत्या करणाऱ्या आरोपीला न्यायालयाने १५ दिवसांची न्यायालयीन कोठडी सुनावली आहे. यापूर्वी न्यायालयाने आरोपीला एक दिवसाची पोलीस कोठडी दिली होती.
ही धक्कादायक घटना २९ डिसेंबर रोजी पहाटे सुमारे २.३० वाजता उघडकीस आली होती. आरोपी राहुल याने पत्नी रुपाली म्हस्के आणि चार वर्षांचा मुलगा रियांश यांची कुऱ्हाडीने हत्या केल्याचे तपासात निष्पन्न झाले आहे. या घटनेने संपूर्ण परिसर हादरून गेला होता.
या प्रकरणी मोळा येथील भास्कर शंकर वानखेडे (वय ५५) यांनी दिलेल्या तक्रारीवरून आरोपी राहुलविरुद्ध खुनाचा गुन्हा दाखल करण्यात आला. आरोपीला अटक करून मेहकर न्यायालयात हजर केले असता, न्यायालयाने त्याला एक दिवसाची पोलीस कोठडी सुनावली होती.
पोलीस कोठडीची मुदत संपल्यानंतर ३० डिसेंबर रोजी आरोपीला पुन्हा न्यायालयात हजर करण्यात आले. यावेळी न्यायालयाने त्याला १५ दिवसांची न्यायालयीन कोठडी सुनावत त्याची कारागृहात रवानगी केली आहे.
या दुहेरी हत्येच्या घटनेने जिल्ह्यात खळबळ उडाली असून, चारित्र्याच्या संशयातून घडलेल्या या अमानुष कृत्यावर समाजातून तीव्र संताप व्यक्त केला जात आहे.
Leave a Comment