कायद्याची अंमलबजावणी करणाऱ्या पोलीस ठाण्यातच लाचेचा व्यवहार झाल्याचा धक्कादायक प्रकार समोर आला आहे. ना-हरकत प्रमाणपत्रासाठी कथितरित्या ६५ हजार रुपयांची मागणी आणि तडजोडीनंतर ३५ हजार रुपये स्वीकारताच चान्नी पोलीस ठाण्यातील पोलीस उपनिरीक्षक महादेव देशमुख एसीबीच्या जाळ्यात अडकले. अकोला व वाशिम लाचलुचपत प्रतिबंधक विभागाच्या संयुक्त पथकाने मंगळवारी (१८ ऑगस्ट) ही कारवाई करत त्यांना रंगेहात पकडले.
मिळालेल्या माहितीनुसार, माळसूर येथील बिअर शॉपीचे मालक शुभम थिटे यांच्या बिअर शॉपीला वाईन बारचा परवाना मिळविण्यासाठी आवश्यक असलेले ना-हरकत प्रमाणपत्र देण्याच्या मोबदल्यात पोलीस उपनिरीक्षक महादेव देशमुख यांनी कथितरित्या ६५ हजार रुपयांची लाच मागितल्याचा आरोप आहे.
मात्र, तक्रारदार आणि संबंधित अधिकाऱ्यामध्ये तडजोड झाल्यानंतर ३५ हजार रुपये देण्याचे ठरले. यानंतर शुभम थिटे यांनी थेट लाचलुचपत प्रतिबंधक विभागाकडे तक्रार दाखल केली.
तक्रारीची पडताळणी केल्यानंतर एसीबीच्या पथकाने सापळा रचला. ठरल्याप्रमाणे मंगळवारी १८ ऑगस्ट रोजी चान्नी पोलीस ठाण्यात ३५ हजार रुपयांची लाच स्वीकारताच अकोला व वाशिम एसीबीच्या संयुक्त पथकाने पोलीस उपनिरीक्षक महादेव देशमुख यांना रंगेहात पकडले.
पोलीस ठाण्यातच झालेल्या या कारवाईमुळे परिसरात एकच खळबळ उडाली आहे. या प्रकरणी चान्नी पोलीस ठाण्यात गुन्हा दाखल करण्याची प्रक्रिया सुरू असून, लाचलुचपत प्रतिबंधक विभागाकडून पुढील तपास सुरू आहे.लाच मागितल्याचा आरोप आणि एसीबीची थेट कारवाई यामुळे चान्नी पोलीस ठाणे सध्या चर्चेच्या केंद्रस्थानी आले आहे.
Leave a Comment