पावसाळ्यात निसर्गाचा स्वर्ग अनुभवायचा? मग एकदा तरी भेट द्या मुक्तागिरीला!

अमरावती जिल्ह्याच्या सातपुडा पर्वतरांगांमध्ये महाराष्ट्र–मध्य प्रदेश सीमेवर वसलेले मुक्तागिरी (Muktagiri) हे राज्यातील सर्वात निसर्गरम्य आणि पवित्र जैन तीर्थक्षेत्रांपैकी एक आहे. पावसाळ्यात येथील हिरवागार परिसर, धुक्याने झाकलेले डोंगर आणि सुमारे २०० ते २५० फूट उंचावरून कोसळणारा भव्य धबधबा पर्यटकांना अक्षरशः मंत्रमुग्ध करून टाकतो.

मुक्तागिरीची ओळख येथील ५२ प्राचीन दिगंबर जैन मंदिरांमुळे आहे. डोंगररांगांमध्ये विखुरलेली ही मंदिरे आणि त्यांच्या पार्श्वभूमीवर कोसळणारा धबधबा हे दृश्य प्रत्येक पर्यटकाच्या कॅमेऱ्यात कैद व्हावे असेच आहे. धार्मिक पर्यटनासोबतच निसर्गप्रेमी आणि छायाचित्रकारांसाठीही हे ठिकाण आकर्षणाचे केंद्र ठरले आहे.

कसे जायचे?

अकोटवरून मुक्तागिरीचे अंतर सुमारे ८० किलोमीटर आहे. अकोट–परतवाडा मार्गे बैतूल रोडने थेट मुक्तागिरी गाठता येते. अकोट आणि परतवाडा येथून खाजगी टॅक्सी तसेच एसटी बसची सुविधा उपलब्ध आहे.

कधी जायचे?

मुक्तागिरीला भेट देण्यासाठी जुलै ते ऑक्टोबर हा सर्वोत्तम कालावधी मानला जातो. या काळात धबधबा पूर्ण क्षमतेने वाहत असल्याने परिसराचे सौंदर्य अनेक पटींनी खुलते. सकाळच्या वेळेत वातावरण अधिक आल्हाददायक असल्याने पर्यटनाचा आनंद द्विगुणित होतो.

पर्यटकांनी लक्षात ठेवाव्यात या गोष्टी

• डोंगरावरील जैन मंदिरांमध्ये चप्पल किंवा बूट घालण्यास परवानगी नाही, त्यामुळे अनवाणी जावे लागते.
• पावसाळ्यात पायऱ्या ओलसर असतात, त्यामुळे सावधगिरी बाळगावी.
• परिसर स्वच्छ ठेवून धार्मिक स्थळाचा सन्मान करावा.
• लहान मुले आणि ज्येष्ठ नागरिकांसोबत जाताना विशेष काळजी घ्यावी.

या पावसाळ्यात जर तुम्ही गर्दीपासून दूर, निसर्गाच्या सान्निध्यात शांततेचा अनुभव घ्यायचा विचार करत असाल, तर मुक्तागिरी हे ठिकाण तुमच्यासाठी एक अविस्मरणीय पर्यटनस्थळ ठरू शकते. हिरवाई, धबधबा आणि अध्यात्म यांचा अनोखा संगम अनुभवण्यासाठी एकदा तरी मुक्तागिरीला नक्की भेट द्या.