अकोला जिल्ह्यातील बाळापूर तालुक्यातील वाडेगाव येथे धक्कादायक घटना समोर आली आहे. स्थानिक पोलिस चौकीसमोरच एका ६५ वर्षीय इसमाने विष प्राशन केल्याने परिसरात एकच खळबळ उडाली. ही घटना बुधवार, १३ मे रोजी सकाळी साडेअकराच्या सुमारास घडली.
मिळालेल्या प्राथमिक माहितीनुसार, पातूर तालुक्यातील आगीखेड येथील रहिवासी देवगन राघोजी अवचार (वय ६५) यांनी वाडेगाव पोलिस चौकीसमोर विष प्राशन केले. विशेष म्हणजे घटना घडली त्या वेळी पोलिस चौकीमध्ये कोणतेही कर्मचारी उपस्थित नसल्याची माहिती समोर आली आहे.
संबंधित इसमासोबत त्यांचे नातेवाईक उपस्थित होते. त्यांनी हा प्रकार लक्षात येताच तातडीने रुग्णवाहिका बोलावून त्यांना वाडेगाव येथील प्राथमिक आरोग्य केंद्रात दाखल केले.
तेथे वैद्यकीय अधिकारी डॉ. श्रीकांत करवते यांनी प्राथमिक उपचार केल्यानंतर प्रकृती गंभीर असल्याने पुढील उपचारासाठी जिल्हा सामान्य रुग्णालय, अकोला येथे हलविण्यात आले.
दरम्यान, ही घटना घरगुती वादातून घडल्याची प्राथमिक माहिती समोर येत आहे. घटनेमुळे वाडेगाव परिसरात मोठी चर्चा सुरू झाली असून पोलिसांकडून पुढील तपास सुरू करण्यात आला आहे.
Leave a Comment