डिजिटल युगात गुन्हेगारीचे नवे प्रकार समोर येत असताना जळगाव जामोद तालुक्यातील एक धक्कादायक प्रकरण उघडकीस आले आहे. सोशल मीडियावरून थेट भारतीय चलनाच्या बनावट नोटांची विक्री करण्याचा प्रयत्न करणाऱ्या २३ वर्षीय तरुणावर पोलिसांनी कारवाई करत मोठा घोटाळा उघड केला आहे.
मिळालेल्या माहितीनुसार, वाडी बुद्रुक येथील रहिवासी राहुल अनिल पवार याने “शंकर भोसले” या नावाने इन्स्टाग्राम हँडल तयार करून ५०, १००, २०० आणि ५०० रुपयांच्या बनावट नोटा विक्रीसाठी असल्याचे व्हिडिओ पोस्ट केले होते. “कमी पैशात जास्त नोटा मिळवा” असे आमिष दाखवत तो नागरिकांची आर्थिक फसवणूक करण्याच्या तयारीत होता.
मात्र, पोलिसांच्या सायबर वॉचमुळे हा प्रकार वेळीच उघड झाला आणि आरोपीचा डाव फसला. पोलीस हेड कॉन्स्टेबल संजय वेरुळकार यांच्या तक्रारीवरून जळगाव जामोद पोलीस स्टेशनमध्ये माहिती तंत्रज्ञान अधिनियम (IT Act) कलम ६६ (ड) अंतर्गत गुन्हा दाखल करण्यात आला आहे. महिला हेड कॉन्स्टेबल अर्चना पाचपोर यांनी गुन्ह्याची नोंद केली असून, या प्रकरणाचा तपास पोलीस निरीक्षक नितीन पाटील करत आहेत.
या कारवाईमुळे सोशल मीडियावर ‘फेक करन्सी’चा गोरखधंदा करणाऱ्यांचे धाबे दणाणले असून, पोलिसांनी नागरिकांना अशा आमिषांना बळी न पडण्याचे आवाहन केले आहे.
जळगाव जामोदमधील ही घटना डिजिटल गुन्हेगारीचे वाढते सावट दाखवणारी असून, सोशल मीडियाचा गैरवापर किती धोकादायक ठरू शकतो याची गंभीर जाणीव करून देणारी आहे.
Leave a Comment