अकोला जिल्ह्यातील जिल्हा परिषद शाळांची अवस्था दिवसेंदिवस चिंताजनक बनत चालली आहे. शिक्षकांची कमतरता, अपुऱ्या वर्गखोल्या आणि घटता विद्यार्थी पट या गंभीर समस्यांमुळे शिक्षण व्यवस्थेवर मोठे प्रश्नचिन्ह निर्माण झाले आहे. परिणामी, पालकांचा सरकारी शाळांवरील विश्वास कमी होत असून, मुलांचा ओढा मोठ्या प्रमाणात कॉन्व्हेंट शाळांकडे वळत असल्याचे स्पष्ट दिसत आहे.
जिल्ह्यातील अनेक शाळांमध्ये विद्यार्थ्यांना बसण्यासाठी पुरेशी व्यवस्था नाही. काही ठिकाणी एकाच वर्गात दोन ते तीन वर्गांचे शिक्षण दिले जात असल्याने शिक्षणाची गुणवत्ता घसरत आहे. त्यातच शिक्षकांची अपुरी संख्या ही आणखी गंभीर बाब ठरत असून, एका शिक्षकावर अनेक वर्गांची जबाबदारी टाकली जात आहे.
यामुळे विद्यार्थ्यांना योग्य शिक्षण मिळत नसल्याच्या तक्रारी पालकांकडून सातत्याने समोर येत आहेत. दुसरीकडे, कॉन्व्हेंट शाळांमध्ये इंग्रजी माध्यम, चांगल्या सुविधा आणि नियमित शिक्षक उपलब्ध असल्याने पालक त्याला प्राधान्य देताना दिसत आहेत.
आता प्रश्न असा उपस्थित होतो की, पुढील शैक्षणिक सत्र सुरू होण्यापूर्वी शिक्षण विभाग जागा होणार का? शिक्षक भरती आणि पायाभूत सुविधा सुधारणा तातडीने केल्या नाहीत, तर पुढील सत्रात पालक मराठी शाळांकडे पूर्णपणे पाठ फिरवण्याची शक्यता नाकारता येत नाही.
हीच परिस्थिती कायम राहिली, तर जिल्हा परिषदांच्या मराठी शाळा बंद पडण्याच्या मार्गावर जाण्याचा धोका निर्माण झाला आहे. त्यामुळे शिक्षण विभागाने तातडीने ठोस निर्णय घेण्याची गरज निर्माण झाली आहे.
Leave a Comment