कोट्यवधी रुपये खर्च करून उभारण्यात आलेले अकोट रेल्वे स्थानक प्रवाशांसाठी सुरक्षित ठरण्याऐवजी धोकादायक बनत असल्याचे धक्कादायक वास्तव समोर आले आहे. भरदिवसा प्लॅटफॉर्मवरच एका व्यक्तीला काही जणांनी बेदम मारहाण केल्याची घटना घडली असून या घटनेचा व्हिडिओ सोशल मीडियावर मोठ्या प्रमाणात व्हायरल झाला आहे. या प्रकारामुळे रेल्वे प्रशासनाच्या सुरक्षाव्यवस्थेवर गंभीर प्रश्नचिन्ह निर्माण झाले आहे.
प्रत्यक्षदर्शींच्या माहितीनुसार, अकोट रेल्वे स्थानकाच्या प्लॅटफॉर्मवर एका महिलेसोबत असलेल्या व्यक्तीला काही जणांनी मारहाण केली. या घटनेदरम्यान स्थानकावर कोणतीही प्रभावी सुरक्षा व्यवस्था दिसून आली नाही. उपस्थित असलेल्या काही लोकांनी हा संपूर्ण प्रकार मोबाईलमध्ये कैद केला आणि तो व्हिडिओ इंटरनेटवर व्हायरल झाला.
अकोट रेल्वे स्थानकावर सुरक्षेचा मोठा अभाव आहे. येथे रेल्वे सुरक्षा दल (RPF) किंवा जीआरपी पोलिसांची नियमित गस्त नसल्याचा आरोप केला जात आहे. स्थानकावर कायमस्वरूपी सुरक्षा कार्यालय नसल्यामुळे गुन्हेगारी प्रकार घडण्याची शक्यता वाढल्याचे नागरिकांचे म्हणणे आहे.
भरदिवसा प्लॅटफॉर्मवर एखाद्याला मारहाण होत असेल तर रात्रीच्या वेळी प्रवाशांनी सुरक्षित प्रवास कसा करायचा? असा संतप्त प्रश्न आता नागरिक उपस्थित करत आहेत. विशेषतः महिला आणि ज्येष्ठ नागरिकांसाठी ही परिस्थिती अधिक धोकादायक ठरत आहे.
या व्हायरल घटनेनंतर रेल्वे प्रशासनाने तातडीने चौकशी करून अकोट रेल्वे स्थानकावरील सुरक्षा व्यवस्था मजबूत करावी, अशी जोरदार मागणी नागरिकांकडून होत आहे. आता तरी रेल्वे प्रशासन आणि सुरक्षा यंत्रणा जागी होणार का? याकडे सर्वांचे लक्ष लागले आहे.
Leave a Comment