अकोट तालुक्यातील दहिहांडा पोलीस स्टेशन हद्दीत गोवंश तस्करीविरोधात धडक कारवाई करण्यात आली असून सिने स्टाईल पाठलाग करून पोलिसांनी चारचाकी वाहन जप्त केले आहे. या कारवाईमुळे गोवंश तस्करांमध्ये खळबळ उडाली आहे.
दिनांक १६ फेब्रुवारी २०२६ रोजी मध्यरात्री दरम्यान दहिहांडा पोलीस स्टेशनचे नाईट ऑफिसर व पोलीस स्टाफ पेट्रोलिंग करत होते. दरम्यान ग्राम कावसा येथील बौद्ध विहाराजवळ रात्री सुमारे १.३० वाजता एक संशयित चारचाकी वाहन येताना दिसले. पोलिसांनी वाहन थांबवण्याचा इशारा केला असता चालकाने वाहन न थांबवता भरधाव वेगाने पळ काढला.
यानंतर पोलिसांनी तत्काळ पाठलाग सुरू केला. कावसा येथून शेगाव रोडकडे धावणाऱ्या या वाहनाचा थरारक पाठलाग करत अखेर साईकृपा पेट्रोलपंपजवळ वाहन अडवण्यात आले. मात्र वाहनातील तीनही आरोपी अंधाराचा फायदा घेत खाली उतरून पळून गेले. पोलिसांनी शोधमोहीम राबवली, मात्र ते हाती लागले नाहीत.
वाहनाची तपासणी केली असता इंडीगो कार क्रमांक MH-12 KN-0626 (अंदाजे किंमत २ लाख रुपये) आढळून आली. वाहनात एक लाल रंगाची, सुमारे १५ वर्षे वयाची गाय आढळली. शिंगे आतील बाजूस वळलेली व शेपटीचा गोंडा काळा असा तपशील नोंदवण्यात आला. गायीची किंमत अंदाजे १५ हजार रुपये असल्याचे सांगण्यात आले. दरम्यान एक गोवंश वाहनातून खाली उतरून अंधारात निसटल्याचेही समोर आले.
स्वतःच्या आर्थिक फायद्यासाठी जनावरांची निर्दयतेने कत्तलीसाठी वाहतूक केली जात असल्याचे प्राथमिक तपासात निष्पन्न झाले. या प्रकरणी दहिहांडा पोलीस स्टेशन येथे प्राणी संरक्षण अधिनियमांतर्गत गुन्हा दाखल करण्यात आला आहे.
ही कारवाई पोलीस अधीक्षक अर्चित चांडक, अप्पर पोलीस अधीक्षक चंद्रकांत रेड्डी, सहाय्यक पोलीस अधीक्षक निखिल पाटील (उपविभाग अकोट) यांच्या मार्गदर्शनाखाली सहाय्यक पोलीस निरीक्षक गोपाल ढोले (ठाणेदार), पो.उपनि. प्रकाश महाजन, पो.हवा. सतीश वानखडे, विजय चव्हाण व विनोद गोलाईत यांच्या पथकाने केली.
पोलिसांकडून फरार आरोपींचा शोध सुरू असून पुढील तपास सुरू आहे.
Leave a Comment