स्वयंसेवी संस्थेच्या मदतीने दहा दिवसांच्या बालिकेला उपचारासाठी नागपूरला पाठवतो, असे सांगून तिची अडीच लाख रुपयांत विक्री केल्याचा धक्कादायक प्रकार भंडारा जिल्ह्यातील मोहाडी तालुक्यात उघडकीस आला आहे. या प्रकरणाचा मुख्य सूत्रधार गोंदिया येथील डॉ. नीतेश बाजपेयी असून तो सध्या फरार आहे. वरठी पोलिसांनी पाच जणांविरुद्ध गुन्हा दाखल केला असून एकाला अटक करण्यात आली आहे.
मोहाडी तालुक्यातील पांढराबोडी येथील मालती प्रकाश वाघमारे हिच्या घरी दहा दिवसांची नवजात बालिका असल्याची माहिती २ फेब्रुवारी रोजी महिला व बालकल्याण विभागाच्या ‘चाइल्ड हेल्पलाईन’वर अज्ञात व्यक्तीने दिली होती. त्यानुसार हेल्पलाईन समन्वयक घटनास्थळी पोहोचले असता बालिका आढळून आली. चौकशीदरम्यान ती गोंदिया येथून आणल्याचे सांगण्यात आले.
या प्रकरणाची माहिती पोलिसांना देण्यात आल्यानंतर तपासाला वेग आला. दरम्यान, ४ फेब्रुवारी रोजी बालिकेचे खरे आई-वडील बालकल्याण समितीसमोर हजर झाले आणि संपूर्ण प्रकार उघड झाला. पालकांनी दिलेल्या माहितीनुसार, मुदतपूर्व जन्म झालेल्या बालिकेची प्रकृती नाजूक होती. उपचारासाठी तिला डॉ. नीतेश बाजपेयी यांच्याकडे दाखल करण्यात आले होते.
उपचारासाठी पैसे नसल्याने बालिकेला स्वयंसेवी संस्थेमार्फत नागपूर येथे पाठवतो, असे सांगत डॉक्टरांनी पालकांची दिशाभूल केली. प्रत्यक्षात ललेश्वरी सादेपाच (रा. गोंदिया) हिच्या मदतीने बालिकेची मालती वाघमारे यांना अडीच लाख रुपयांत विक्री करण्यात आल्याचे तपासात समोर आले.
पोलिसांनी गुन्हा दाखल करून तपास सुरू केला असून मुख्य आरोपी फरार असल्याने त्याचा शोध सुरू आहे. या घटनेमुळे जिल्ह्यात मोठी खळबळ उडाली आहे.
Leave a Comment