जम्मू-काश्मीरच्या डोडा जिल्ह्यातील भदेरवाह भागात देशाला हादरवणारी घटना समोर आली आहे. खानी टॉप परिसरात लष्कराचे बुलेटप्रूफ वाहन अनियंत्रित होऊन तब्बल 200 फूट खोल दरीत कोसळले. या भीषण अपघातात 10 जवानांना वीरमरण आले असून 7 जवान गंभीर जखमी झाले आहेत. या घटनेमुळे संपूर्ण देशभरात शोककळा पसरली आहे.
लष्करी अधिकाऱ्यांनी दिलेल्या माहितीनुसार, हे वाहन 17 जवानांना घेऊन उंचावर असलेल्या लष्करी पोस्टच्या दिशेने जात होते. दुर्गम आणि अरुंद डोंगराळ रस्त्यावर अचानक चालकाचे वाहनावरील नियंत्रण सुटले आणि काही क्षणांतच वाहन दरीत कोसळले. वाहन बुलेटप्रूफ असल्याने त्याचे वजन अधिक होते, त्यामुळे अपघाताची तीव्रता वाढल्याचे सांगण्यात येत आहे.
अपघाताची माहिती मिळताच लष्कराचे बचाव पथक आणि स्थानिक प्रशासन तातडीने घटनास्थळी दाखल झाले. प्रतिकूल हवामान, धुके आणि निसरडे रस्ते असूनही बचावकार्य युद्धपातळीवर राबवण्यात आले. दरीत उतरून जवानांना बाहेर काढण्यात आले. जखमींपैकी 4 जवानांची प्रकृती अत्यंत गंभीर असल्याने त्यांना एअरलिफ्ट करून उधमपूर येथील लष्करी रुग्णालयात दाखल करण्यात आले आहे.
या अपघातानंतर लष्कराने घटनेच्या कारणांचा सखोल तपास सुरू केला असून भविष्यात अशा दुर्घटना टाळण्यासाठी आवश्यक उपाययोजना करण्याचे संकेत दिले आहेत. देशाच्या सुरक्षेसाठी प्राणांची आहुती देणाऱ्या या वीर जवानांच्या बलिदानाला संपूर्ण राष्ट्र सलाम करत आहे.
Leave a Comment