अकोटसह 84 खेड्यांना दोन दिवस ‘पाणी ब्रेक

अडगाव येथील पाणीपुरवठा बंद झाल्याने व्हॉल्व्ह दुरुस्तीचे काम तसेच अकोट शहरातील जलशुद्धीकरण केंद्रावर स्वच्छतेचे काम हाती घेण्यात येणार आहे. त्यामुळे अकोट शहरासह अकोट 84 खेडी प्रादेशिक पाणीपुरवठा योजना, हिवरखेड, अडगाव आणि तेल्हारा शहराचा पाणीपुरवठा 11 आणि 12 ऑगस्ट 2026 रोजी बंद राहणार आहे.

महाराष्ट्र जीवन प्राधिकरणाच्या अकोट उपविभागाकडून याबाबत नागरिकांना माहिती देण्यात आली आहे. अडगाव येथील पाणीपुरवठा बंद झाल्याने संबंधित व्हॉल्व्हची दुरुस्ती करणे आवश्यक असून, त्यासोबतच अकोट शहर जलशुद्धीकरण केंद्रावरील स्वच्छतेचे कामही करण्यात येणार आहे.

या कामामुळे 11 ऑगस्ट ते 12 ऑगस्ट 2026 या कालावधीत संबंधित शहर व गावांमध्ये पाणीपुरवठा खंडित राहणार आहे. त्यामुळे नागरिकांनी उपलब्ध पाण्याचा काटकसरीने वापर करावा आणि आवश्यक पाणीसाठा करून ठेवावा, असे आवाहन करण्यात आले आहे.

दरम्यान, दुरुस्ती व स्वच्छतेचे काम शक्य झाल्यास एकाच दिवसात पूर्ण करून पाणीपुरवठा पूर्ववत करण्यात येईल, अशी माहिती महाराष्ट्र जीवन प्राधिकरणाने दिली आहे.

मात्र, कामाचा कालावधी वाढल्यास नागरिकांना आणखी काही काळ पाणीटंचाईचा सामना करावा लागू शकतो. त्यामुळे प्रशासनाने काम वेळेत पूर्ण करून पाणीपुरवठा लवकरात लवकर सुरू करावा, अशी अपेक्षा नागरिकांकडून व्यक्त होत आहे.

एन. के. राऊत, उपविभागीय अभियंता (प्र.), महाराष्ट्र जीवन प्राधिकरण, उपविभाग अकोट यांनी यासंदर्भात माहिती दिली आहे.

कुठे पाणीपुरवठा बंद राहणार?

• अकोट शहर
• अकोट 84 खेडी प्रादेशिक पाणीपुरवठा योजना
• हिवरखेड
• अडगाव
• तेल्हारा शहर

कालावधी : 11 व 12 ऑगस्ट 2026

नागरिकांनी प्रशासनाच्या सूचनेची दखल घेत पाण्याचा अपव्यय टाळावा आणि आवश्यक पाणीसाठा करून ठेवावा.