मलकापूर ते कुऱ्हा गोतमारा दरम्यान धावणारी महाराष्ट्र राज्य परिवहन मंडळाची बस रस्त्याच्या बाजूला घसरून खड्ड्यात कलंडल्याची घटना घडली असून या अपघातात किमान १२ प्रवासी जखमी झाले आहेत. जखमींना तातडीने नजीकच्या शासकीय रुग्णालयात उपचारासाठी दाखल करण्यात आले असून सुदैवाने मोठी जीवितहानी टळली आहे. चालकाने वेळीच बस नियंत्रित केल्याने संभाव्य भीषण दुर्घटना टळल्याचे प्रत्यक्षदर्शींनी सांगितले.
मोताळा तालुक्यातील धामणगाव बढे परिसरात गुरुवारी, ५ फेब्रुवारी रोजी सकाळी साडे अकरा वाजताच्या सुमारास हा अपघात घडला. बस क्रमांक एमएच ४० एन ९४८६ ही कुऱ्हा गोतमारा येथून मलकापूरकडे निघाली होती. खेडी आणि कोऱ्हाळा दरम्यान रस्त्याच्या सुरू असलेल्या कामामुळे खड्डे व मातीचा भराव टाकण्यात आला होता. त्याच भरावाचा अंदाज चालकाला न आल्याने बस घसरली आणि रस्त्याशेजारील खोल चरीत उतरली.
सकाळची वेळ आणि प्रवाशांची गर्दी असल्याने अपघाताच्या वेळी बसमध्ये मोठ्या संख्येने प्रवासी होते. बस खड्ड्यात अडकल्याने प्रवाशांमध्ये एकच खळबळ उडाली. घटनेनंतर स्थानिक नागरिकांनी तातडीने घटनास्थळी धाव घेत बचावकार्य सुरू केले. पोलिसही तत्काळ दाखल झाले. जखमींना बाहेर काढून प्राथमिक उपचारांसाठी रुग्णालयात हलविण्यात आले.
सदर मार्गावर सध्या रस्त्याच्या रुंदीकरणाचे काम सुरू असून वाहतूक वळवण्यात आली आहे. मात्र रस्त्यावर टाकलेल्या मातीमुळे वाहनचालकांना मोठा अडथळा निर्माण होत आहे. भविष्यात असे अपघात टाळण्यासाठी बांधकाम विभागाने तातडीने सुरक्षा उपाययोजना कराव्यात, अशी मागणी स्थानिक नागरिक व प्रवाशांकडून होत आहे.
या अपघातामुळे काही काळ वाहतूक विस्कळीत झाली होती. सुदैवाने जीवितहानी टळल्याने मोठा अनर्थ टळला असला तरी रस्त्याच्या कामातील निष्काळजीपणाचा प्रश्न पुन्हा ऐरणीवर आला आहे.
