मुर्तीजापूरकडून कारंजा लाडच्या दिशेने भरधाव वेगाने जाणाऱ्या चारचाकी वाहनाचा ताबा सुटल्याने वाहन थेट रस्त्याखाली कोसळून भीषण अपघात झाल्याची घटना आज सायंकाळी सुमारे ६.३० वाजण्याच्या सुमारास उमरी येथे घडली. या अपघातामुळे परिसरात एकच खळबळ उडाली.
घटनेची माहिती मिळताच येथील आपत्कालीन पथकाने तातडीने घटनास्थळी धाव घेत जखमींना वाहनातून बाहेर काढले. त्यानंतर जखमींना प्राथमिक उपचारासाठी शासकीय रुग्णालयात दाखल करण्यात आले. प्राथमिक माहितीनुसार यशवंत राठोड (वय ३१), अक्षय रोकडे (वय २७) आणि ओम मुंदे (वय १९) हे गंभीर जखमी झाले असून त्यांना पुढील उपचारासाठी येथे हलविण्यात आले आहे.
दरम्यान, या भीषण अपघातात रोहित रिक (वय २५) आणि संकेत मेश्राम (वय २५) यांचा जागीच मृत्यू झाला. अपघातातील सर्व प्रवासी हे येथील रहिवासी असल्याची माहिती समोर आली आहे.
अपघात नेमका कशामुळे झाला, वाहनाचा वेग किती होता आणि तांत्रिक बिघाड होता का, याबाबत पोलीस सखोल तपास करत आहेत. या दुर्घटनेमुळे परिसरात हळहळ व्यक्त होत असून नागरिकांकडून वाहतूक नियम पाळण्याचे आवाहन केले जात आहे.
