अकोला न्यूज नेटवर्क ब्युरो दिनांक २९ नोव्हेंबर २०२५:अकोट नगर परिषद निवडणुकीच्या पार्श्वभूमीवर धक्कादायक घटना समोर आली आहे. नगरसेवक पदासाठी उभ्या असलेल्या अजित पवार गटाच्या महिला उमेदवार अलमास परविन शेख सलीम यांचा आज सकाळी भीषण अपघातात मृत्यू झाला. अचानक झालेल्या या घटनेने अकोला जिल्ह्यात शोककळा पसरली असून निवडणूक वातावरणावर याचा गंभीर परिणाम झाला आहे.
मिळालेल्या माहितीनुसार, अलमास परविन शेख सलीम या पती आणि मुलासह त्यांच्या माहेरी निघाल्या होत्या. अमरावती जिल्ह्यातील परतवाडा परिसरात एका भरधाव ट्रकने त्यांच्या दुचाकीला जोरदार धडक दिली. अपघात इतका गंभीर होता की अलमास शेख यांचा घटनास्थळी मृत्यू झाला. पती आणि मुलालाही दुखापत झाल्याची माहिती स्थानिकांनी दिली.
अलमास परविन शेख सलीम या अकोट नगर पालिकेतील प्रभाग क्रमांक ४ मधून राष्ट्रवादी काँग्रेस (अजित पवार गट) यांच्या अधिकृत उमेदवार होत्या. स्थानिक पातळीवर त्यांची प्रतिमा चांगली होती आणि त्यांनी प्रचारालाही जोरदार सुरुवात केली होती. मात्र निवडणुकीच्या तोंडावर घडलेल्या या घटनेने पक्षात खळबळ उडाली आहे.
अपघाताची बातमी समजताच राष्ट्रवादीच्या कार्यकर्त्यांनी परतवाडा येथील रुग्णालयात धाव घेतली. जिल्हा पदाधिकाऱ्यांनी याला पक्षासाठी मोठी हानी असल्याची प्रतिक्रिया दिली. अकोट शहरात आणि ग्रामीण भागातही या मृत्यूची चर्चा असून नागरिकांतही हळहळ व्यक्त केली जात आहे.
आज अकोट नगर परिषद निवडणुकीच्या प्रचारासाठी राष्ट्रवादीकडून सभा व प्रचार रॅलीचे आयोजन करण्यात आले होते. मात्र महिला उमेदवाराच्या निधनानंतर पक्षाने सर्व कार्यक्रम रद्द केले. शांततेचे आवाहन करत उमेदवाराच्या परिवाराला सांत्वन व्यक्त करण्यात आले आहे.
निवडणुकीच्या काळात उमेदवाराचा झालेला असा अपघाती मृत्यू दुर्मिळ मानला जातो. त्यामुळे या घटनेची सखोल चौकशी होण्याची मागणीही स्थानिक नागरिकांनी केली आहे. अकोटमधील निवडणूक वातावरणात शोकाची छाया पसरलेली असून आगामी कार्यक्रमांवर याचा परिणाम होण्याची शक्यता व्यक्त केली जात आहे.
