अकोला न्यूज नेटवर्क ब्युरो घोडेगाव प्रतिनिधी विकास दामोदर:तेल्हारा ग्रामीण केंद्र अंतर्गत आयोजित केंद्रस्तरीय शिक्षण परिषद घोडेगाव येथील जिल्हा परिषद मराठी शाळेत उत्साहपूर्ण वातावरणात पार पडली. शैक्षणिक गुणवत्तेला नवे दिशादर्शन देणाऱ्या या परिषदेची सुरुवात माँ सावित्रीबाई फुले यांच्या प्रतिमापूजनाने झाली. शाळा व्यवस्थापन समितीचे अध्यक्ष सुभाष कवळे, प्रमुख पाहुणे केंद्रप्रमुख सौ. सीमा टोहरे, तसेच तेल्हारा कृषी उत्पन्न बाजार समितीचे माजी उपसभापती प्रा. प्रदीप ढोले यांच्या उपस्थितीने कार्यक्रमात उत्साह दाटून आला.
सामाजिक बांधिलकीचा अनोखा वारसा
दानशूर व्यक्तिमत्व म्हणून ओळख असलेल्या प्रा. प्रदीप ढोले यांनी आपल्या स्वर्गीय भाऊ विजयकुमार ढोले यांच्या स्मृतीप्रित्यर्थ याही वर्षी शाळेला १५०० लिटर क्षमतेची पाण्याची टाकी भेट दिली. शाळेतील मूलभूत सुविधांसाठी त्यांनी नेहमीच पुढाकार घेतला असून हा उपक्रम विद्यार्थ्यांच्या हिताचा ठरला आहे. तसेच स्व. मनोहरराव ताथोड यांच्या स्मृतीप्रित्यर्थ राजेश ताथोड यांनी शाळेला ३००० रुपये रोख हस्तांतरित केले. सामाजिक बांधिलकी आणि शैक्षणिक विकासाची ही परंपरा समाजातील सकारात्मक बदलाचे दर्शन घडवते.
विजयकुमार ढोले यांचा सामाजिकतेचा वारसा त्यांची मुले इंजि. अजिंक्य ढोले, इंजि. अभिषेक ढोले आणि परुल ढोले पुढे नेत आहेत, ही गोष्ट उपस्थित मान्यवरांनी गौरवली.
गुणवंत विद्यार्थ्यांचा सन्मान
मागील शैक्षणिक वर्षात उल्लेखनीय कामगिरी करणाऱ्या विद्यार्थ्यांचा गुणगौरव करून त्यांना स्मृतीचिन्ह आणि भेटवस्तू देण्यात आल्या. विद्यार्थ्यांच्या उत्साहाला आणि प्रेरणेला एक नवी ऊर्जा देणारा हा सन्मान सोहळा ठरला.
विषयानुसार मार्गदर्शनाचा प्रभावी सत्र
शिक्षण परिषदेचा दुसरा सत्र हा विद्यार्थ्यांसाठी ज्ञानमहोत्सव ठरला. विविध विषयातील तज्ज्ञ शिक्षकांनी विद्यार्थ्यांना मार्गदर्शन केले.
- प्रा. विकास दामोदर – इंग्रजी विषय
- सगणे मॅडम – गणित
- अविनाश भारसाकळे सर – बुद्धिमत्ता चाचणी
- प्रणिता गावंडे मॅडम – मराठी
त्याचबरोबर निपुण भारत उपक्रमासंबंधी श्रद्धा भागवत मॅडम, खडसे सर, बुंदे सर, वासनकर सर, गिऱ्हे सर, हिदायत खान सर, मो. सोहिल सर आणि मकसूद सर यांनी विद्यार्थ्यांना आवश्यक मार्गदर्शन केले. विद्यार्थ्यांच्या बौद्धिक आणि शैक्षणिक क्षमतेच्या विकासासाठी ही सत्रे अत्यंत उपयुक्त ठरली.
सुव्यवस्थित आयोजन आणि उत्साही सहभाग
संपूर्ण कार्यक्रमाचे आयोजन केंद्रप्रमुख सौ. टोहरे यांच्या मार्गदर्शनाखाली आणि मुख्याध्यापक दीपक दहि सर यांच्या नियोजनात पार पडले. पाथर्डी, तूदगाव, थार आणि गाडेगाव येथील विद्यार्थी या परिषदेचे भागीदार ठरले. कार्यक्रमाचे सुत्रसंचालन अविनाश भारसाकळे सर यांनी तर आभार प्रदर्शन प्रा. विकास दामोदर यांनी केले.
कार्यक्रम यशस्वी करण्यासाठी सर्व शिक्षकवर्ग आणि विद्यार्थ्यांनी मनापासून परिश्रम घेतले. शिक्षण परिषदेमुळे विद्यार्थ्यांमध्ये नवचैतन्य निर्माण झाले असून अशा उपक्रमांमुळे ग्रामीण भागातील शालेय शिक्षण अधिक प्रभावी होण्यास मदत मिळत आहे.
