अकोला न्यूज नेटवर्क ब्युरो दिनांक १९ नोव्हेंबर २०२५:अकोट नगरपरिषद निवडणुकीसाठी दाखल झालेल्या उमेदवारी अर्जांची मंगळवारी झालेली छाननी प्रक्रिया पूर्ण झाली. या छाननीत नगराध्यक्षपदाचे १६ अर्ज तपासले गेले. त्यापैकी १४ अर्ज वैध ठरले तर २ अर्ज अवैध घोषित झाले. नगरसेवक पदासाठी दाखल झालेल्या २४५ अर्जांपैकी २२८ अर्ज वैध तर १७ अर्ज अवैध ठरले. त्यामुळे अंतिम यादीत कोण कायम राहणार याकडे आता सर्वांचे लक्ष लागले आहे.
छाननी प्रक्रिया निवडणूक निरीक्षक सुधीर खांदे यांच्या उपस्थितीत झाली. निवडणूक निर्णय अधिकारी तसेच सहाय्यक निवडणूक निर्णय अधिकारी मुख्याधिकारी अमोल लांडे यांनी संपूर्ण प्रक्रिया मार्गदर्शनाखाली पूर्ण केली. अर्ज दाखल केलेल्या उमेदवारांची मोठी उपस्थिती यावेळी दिसून आली. विशेष म्हणजे, छाननीवेळी कोणत्याही उमेदवाराने दुसऱ्या उमेदवाराच्या अर्जावर आक्षेप नोंदवला नाही. त्यामुळे प्रक्रिया शांततेत आणि सुरळीत पार पडल्याची माहिती प्रशासनाकडून देण्यात आली.
नगरसेवक पदाची स्थिती
नगरसेवक पदासाठी दाखल झालेल्या २४५ अर्जांपैकी २२८ उमेदवारांची कागदपत्रे बरोबर असल्याचे दिसून आले. उर्वरित १७ उमेदवारांचे अर्ज तांत्रिक कारणांमुळे अवैध घोषित करण्यात आले. आता अर्ज मागे घेण्याची अंतिम तारीख २१ नोव्हेंबर असल्याने खऱ्या अर्थाने सामना कोणकोणात होणार हे यानंतरच स्पष्ट होणार आहे. अनेक उमेदवार पक्षीय समन्वय, गटबाजी आणि स्थानिक चर्चेमुळे शेवटच्या क्षणी अर्ज मागे घेऊ शकतात, अशी शक्यता वर्तवली जाते.
नगराध्यक्ष पदासाठी कोण टिकले?
नगराध्यक्षपदासाठी पात्र ठरलेल्या १४ उमेदवारांमध्ये प्रमुख पक्षांची उमेदवारी पुढीलप्रमाणे आहे:
- भाजप: माया धुळे
- काँग्रेस: अलका बोडखे
- वंचित बहुजन आघाडी: स्वाती चिखले
- शिवसेना (उद्धव बाळासाहेब ठाकरे गट): विजया चौधरी
- राष्ट्रवादी काँग्रेस (अजित पवार गट): गाजिया बानो मो. बदरुजम्मा
- शिवसेना (शिंदे गट): चंचल पितांबरवाले
- एमआयएम: फिरोजा बी सय्यद शरीफ
या सर्वांच्या अर्जांची छाननीदरम्यान कसून तपासणी करण्यात आली. पक्षाकडून एबी फॉर्म न मिळाल्याने काही इच्छुकांचे अर्ज अवैध ठरले. अनेक पक्षांत अंतर्गत मतभेद असल्याचे चित्र यावेळी समोर आले. काही ठिकाणी दोन ते तीन उमेदवारांकडून एकाच पक्षाच्या नावाने अर्ज दाखल केल्याचे पाहायला मिळाले. मात्र अंतिम एबी फॉर्म न मिळालेल्या उमेदवारांना लढत चालू ठेवता आली नाही.
निवडणूक रणसंग्रामात रंगत
अकोट नगरपरिषद निवडणुकीत यंदा भाजप, काँग्रेस, राष्ट्रवादीचे दोन्ही गट, दोन शिवसेना गट, वंचित बहुजन आघाडी, प्रहार, मनसे, एमआयएम आणि अपक्ष उमेदवार मोठ्या संख्येने मैदानात उतरले आहेत. त्यामुळे त्रिकोणी नव्हे तर बहुकोनी लढत होण्याची चिन्हे आहेत. विशेषत: काही प्रभागांमध्ये एकाच समाजातील उमेदवारांची बहुलता असल्याने अंतिम मतविभाजनावर याचा ठसा उमटेल.
स्थानिक प्रश्न, पाणीपुरवठा, स्वच्छता, रस्ते, कररचना, तसेच गेल्या पाच वर्षांतील कामगिरी या मुद्द्यांवर प्रचार केंद्रित राहणार असल्याचे संकेत मिळत आहेत. २१ नोव्हेंबरनंतर अधिकृत स्पर्धक स्पष्ट झाल्यावर गावागावात प्रचाराचा जोर वाढेल.
अवैध अर्जांची संख्या कमी असली तरी छाननीने एकूण लढतीचे चित्र अधिक स्वच्छ केले आहे. आता पुढचा टप्पा म्हणजे अर्ज मागे घेण्याचा आणि त्यानंतर उमेदवारांच्या अंतिम लढतीचा. अकोटच्या मतदारांनी कोणाला पसंती देणार याकडे संपूर्ण जिल्ह्याचे लक्ष लागले आहे.
