अकोला न्यूज नेटवर्क
कोल्हापूर : जिल्ह्यातील इचलकरंजी शहरात स्थानिक गुन्हे अन्वेषण शाखेच्या (LCB) पथकाने एका घरावर छापा टाकून बनावट नोटांचा कारखाना उद्ध्वस्त केला आहे. मंगळवार पेठेतील एका घरात हा कारखाना सुरू होता. या कारवाईत पोलिसांनी २ लाख २४ हजार २०० रुपयांच्या बनावट नोटा आणि छपाईसाठी वापरले जाणारे ७० हजार ७०० रुपयांचे साहित्य जप्त केले आहे. पोलिसांनी अनिकेत विजय शिंदे (२४), राज रमेश सनदी (१९) आणि सोएब अमजद कलावंत (१९) या तीन आरोपींना अटक केली असून, त्यांनी युट्यूबवरील माहितीच्या आधारे हा कारखाना सुरू केल्याचे तपासात निष्पन्न झाले आहे.
पोलिसांनी सापळा रचून केली कारवाई
स्थानिक गुन्हे शाखेच्या पोलिसांना एका व्यक्तीकडून बनावट नोटा चलनात आणल्या जात असल्याची माहिती मिळाली होती. या माहितीनुसार, पोलिसांनी नारायण टॉकीज परिसरात सापळा रचून अनिकेत शिंदेला ताब्यात घेतले. त्याच्याकडे केलेल्या तपासणीत बनावट नोटा आढळून आल्या. यानंतर पोलिसांनी त्याची कसून चौकशी केली असता, त्याने आपल्या घरातच बनावट नोटा छापत असल्याची कबुली दिली. त्यानंतर पोलिसांनी त्याच्या घरावर छापा टाकत इतर दोन साथीदारांनाही अटक केली. कमी वेळात आणि कमी श्रमात अधिक पैसा कमावण्याच्या हव्यासातून त्यांनी हा मार्ग निवडल्याचे समोर आले आहे.
युट्यूबवरून शिकले नोटा छापणे
आरोपींनी युट्यूबवरील व्हिडिओ पाहून नोटा छपाईची संपूर्ण प्रक्रिया शिकल्याचे तपासात उघड झाले आहे. त्यांनी नोटेची प्रत कार्डशीटवर चिकटवून ती स्कॅन करून प्रिंट काढण्याची पद्धत वापरली होती. यासाठी लागणारे प्रिंटर, स्कॅनर, पेपर आणि इतर साहित्य त्यांनी स्वतंत्रपणे विकत घेतले होते. या प्रकरणातील आरोपी हे एकमेकांच्या संपर्कात होते. पोलिसांनी आता यामागे एखादे मोठे रॅकेट असल्याचा संशय व्यक्त केला आहे. काही दिवसांपूर्वी गडहिंग्लज शहरातही बनावट नोटांचे प्रकरण समोर आले होते, त्यामुळे या प्रकरणाचा तपास पोलिसांनी अधिक गांभीर्याने सुरू केला आहे.
