अकोला न्यूज नेटवर्क
मुंबई : महाराष्ट्र सरकारकडून चालवण्यात येणाऱ्या ‘मुख्यमंत्री माझी लाडकी बहीण’ योजनेअंतर्गत महिलांच्या खात्यात जुलै महिन्याचा हप्ता जमा करण्यास सुरुवात झाली आहे. रक्षाबंधनाच्या पूर्वसंध्येला महिला व बालविकास मंत्री आदिती तटकरे यांनी दिलेल्या आश्वासनानुसार, पात्र लाभार्थी महिलांच्या खात्यात दरमहा १५०० रुपयांचा निधी जमा होत आहे. या निर्णयामुळे रक्षाबंधनासारख्या सणासुदीच्या काळात महिलांना मोठा आर्थिक दिलासा मिळणार आहे.
१३व्या हप्त्याची प्रक्रिया सुरू
महायुती सरकारने जुलै २०२४ पासून ही योजना सुरू केली असून, आतापर्यंत १२ हप्ते महिलांच्या खात्यात जमा झाले आहेत. सध्या १३व्या हप्त्याची रक्कम जमा करण्याची प्रक्रिया सुरू आहे. जुलै महिन्याच्या हप्त्यासाठी २ हजार ९८४ कोटी रुपयांचा निधी वर्ग करण्यात आला होता. या योजनेसाठी राज्य सरकारने एकूण २८ हजार २९० कोटी रुपयांची तरतूद केलेली आहे. या योजनेच्या नियमांनुसार, २१ ते ६५ वयोगटातील महिलांना दरमहा १५०० रुपये दिले जातात.
२६ लाख महिलांची गृहचौकशी
या योजनेमध्ये एका कुटुंबातील केवळ दोन महिलांना लाभ दिला जातो, असा नियम आहे. परंतु, काही कुटुंबांमध्ये दोनपेक्षा जास्त महिलांनी लाभ घेतल्याचं समोर आलं आहे. त्यामुळे, याची पडताळणी करण्यासाठी आता गृहचौकशीची प्रक्रिया सुरू करण्यात आली आहे.
महिला व बालकल्याण विभागाने दोनपेक्षा जास्त महिलांनी लाभ घेतलेल्या तब्बल २६ लाख महिलांची यादी तयार केली आहे. या सर्व महिलांची विभागानुसार चौकशी केली जाणार आहे. या चौकशीत जर एका घरात दोनपेक्षा जास्त महिलांनी लाभ घेतल्याचे आढळले, तर त्या जास्तीच्या महिलांना मिळणारा योजनेचा लाभ बंद केला जाईल. सध्या २ कोटी २९ लाख महिला या योजनेचा लाभ घेत आहेत. या गृहचौकशीनंतर आणखी काही महिला या योजनेतून वगळल्या जाण्याची शक्यता आहे.
योजनेच्या नियमांनुसार लाभ
‘मुख्यमंत्री माझी लाडकी बहीण’ योजनेच्या नियमांनुसार, लाभार्थी महिलांना दरमहा १५०० रुपये मिळतात. मात्र, ज्या महिला शेतकरी ‘पीएम किसान सन्मान निधी’ योजना आणि ‘नमो शेतकरी महासन्मान निधी’ योजनेचा लाभ घेतात, त्यांना ‘मुख्यमंत्री माझी लाडकी बहीण’ योजनेतून ५०० रुपये दिले जातात. त्यामुळे, ज्या महिलांनी आपल्या खात्यात जमा झालेली रक्कम पाहिली नसेल, त्यांनी ती तपासण्याचे आवाहन सरकारकडून करण्यात आले आहे.
