अकोला न्यूज नेटवर्क
मुंबई : राज्यातील राजकारणात पुन्हा एकदा खळबळजनक हालचालींना वेग आला असून, उपमुख्यमंत्री देवेंद्र फडणवीस, अजित पवार आणि धनंजय मुंडे यांच्यात सह्याद्री अतिथीगृहावर झालेल्या बैठकीमुळे चर्चांचे वादळ उठले आहे. विशेष म्हणजे मुख्यमंत्री एकनाथ शिंदे दिल्ली दौऱ्यावर असताना ही घडामोड घडल्याने महायुतीतील अंतर्गत समीकरणांकडे सर्वांचे लक्ष लागले आहे.
काही दिवसांपूर्वी कृषी साहित्य खरेदी प्रकरणात क्लीन चीट मिळाल्यानंतर धनंजय मुंडे पुन्हा मंत्रिमंडळात सहभागी होणार असल्याच्या चर्चा रंगल्या होत्या. त्यातच मंगळवारी त्यांनी थेट फडणवीसांची भेट घेतली. उपमुख्यमंत्री अजित पवार आणि प्रदेशाध्यक्ष सुनील तटकरे यांच्याही उपस्थितीमुळे या बैठकीचे राजकीय महत्त्व अधिकच वाढले आहे. मुंडे माध्यमांपासून दूर राहून केवळ स्मितहास्य करत निघून गेल्याने तर्कवितर्कांना ऊत आला आहे.
दरम्यान, कृषी मंत्री माणिकराव कोकाटे यांच्यावर विधान परिषदेत रमी खेळल्यामुळे वाद ओढवला असून, त्यांच्या राजीनाम्याची शक्यता वर्तवली जात आहे. अशा स्थितीत मुंडे यांना पुन्हा मंत्रिमंडळात संधी मिळू शकते, अशी चर्चा राजकीय वर्तुळात सुरु आहे.
या सगळ्या घडामोडींच्या पार्श्वभूमीवर मुख्यमंत्री एकनाथ शिंदे दिल्लीत असून, तिथे त्यांनी खासदारांशी बैठक घेतली आहे. शिंदे गटात सध्या अस्वस्थता असल्याच्या चर्चा असून, मित्रपक्षांकडून सातत्याने होणाऱ्या कुरघोड्यांबाबत नाराजी वाढत असल्याचे बोलले जात आहे. दिल्लीत सुरु असलेल्या संसदेच्या अधिवेशनाच्या दरम्यान शिंदेंचा दौरा अचानक जाहीर झाला असल्याने त्याला वेगळे राजकीय परिप्रेक्ष्य मिळतोय.
महायुतीतील घटक पक्षांमध्ये समन्वयाचा अभाव आणि अंतर्गत कुरबुरी पुन्हा एकदा स्पष्टपणे दिसू लागल्या असून, यामुळे राज्याच्या राजकारणात मोठा फेरफटका बसण्याची शक्यता नाकारता येत नाही.
