अकोला न्यूज नेटवर्क
नवी दिल्ली : लोकसभेत ‘ऑपरेशन सिंदूर’वर सुरू असलेल्या चर्चेदरम्यान काँग्रेसचे ज्येष्ठ नेते आणि विरोधी पक्षनेते राहुल गांधी यांनी सरकारवर, विशेषतः पंतप्रधान नरेंद्र मोदी, संरक्षण मंत्री राजनाथ सिंह आणि परराष्ट्र मंत्री एस. जयशंकर यांच्यावर जोरदार हल्लाबोल केला. अमेरिकेचे माजी राष्ट्राध्यक्ष डोनाल्ड ट्रम्प यांच्या पाकिस्तानबाबतच्या विधानाचा संदर्भ देत राहुल गांधींनी पंतप्रधानांना थेट आव्हान दिले – “जर तुमच्यात हिंमत असेल तर पंतप्रधानांनी सभागृहात येऊन सांगा की ट्रम्प खोटं बोलत आहेत.”
राहुल गांधी म्हणाले की, जर मोदींमध्ये इंदिरा गांधींसारखे ५० टक्के धाडस असते, तर त्यांनी ट्रम्पच्या दाव्याचे जाहीरपणे खंडन केले असते. त्यांनी संरक्षण मंत्री राजनाथ सिंह यांच्या विधानांचा संदर्भ देत सांगितले की, ऑपरेशन सिंदूर सुरू झाल्यानंतर अवघ्या ३५ मिनिटांत पाकिस्तानला फोन करून आपण लष्करी तळांवर हल्ला करत नसल्याची माहिती दिली गेली, हे सरकारच्या राजकीय इच्छाशक्तीच्या अभावाचे लक्षण असल्याचे ते म्हणाले. “असे वाटते की लढायचीच इच्छा नव्हती; लष्कराला पाठवून लगेचच माघार घेतली,” असा गंभीर आरोप त्यांनी केला.
सरकारवर राजकीय फायद्याचा आरोप
राहुल गांधी म्हणाले की, सरकारने ऑपरेशन सिंदूरचा वापर राष्ट्रीय सुरक्षेसाठी न करता राजकीय प्रतिमाबांधणीसाठी केला. “हे केवळ प्रचारासाठी केले गेलेले आहे,” असा स्पष्ट आरोप त्यांनी केला. त्यांनी इंदिरा गांधींचे उदाहरण देत सांगितले की, १९७१ मध्ये अमेरिकेचा सातवा फ्लीट हिंद महासागरात आल्यानंतरही इंदिरा गांधी डगमगल्या नाहीत आणि लष्करप्रमुख माणेकशॉ यांना पूर्ण स्वातंत्र्य दिले होते. त्याच धर्तीवर आजच्या पंतप्रधानांनीही अशा धाडसी भूमिका घ्यायला हव्यात, असे ते म्हणाले.
परराष्ट्र धोरणावर टीका
परराष्ट्र मंत्री एस. जयशंकर यांच्यावरही राहुल गांधींनी टीका केली. त्यांनी विचारले की, “उद्या पुन्हा दहशतवादी हल्ला झाला तर सरकार काय करणार?” त्यांनी असेही म्हटले की सरकारचे परराष्ट्र धोरण अपयशी ठरले असून, पाकिस्तानला दहशतवादासाठी जबाबदार धरण्याच्या आंतरराष्ट्रीय प्रयत्नांतही अपयश आले आहे. “मुनीर नावाचा दहशतवादी अमेरिकेत ट्रम्पसोबत जेवताना दिसतो आणि आपण फक्त बघ्याची भूमिका घेतो,” असे म्हणत त्यांनी तीव्र नाराजी व्यक्त केली.
राजकीय प्रतिक्रिया अपेक्षित
राहुल गांधींच्या या टीकेनंतर सत्ताधारी भाजपकडून प्रत्युत्तर देण्याची शक्यता आहे. त्यांनी सत्ताधाऱ्यांना इशारा दिला की, “सैन्याचा वापर प्रचारासाठी किंवा निवडणुकीसाठी करणे हा अपमान आहे.” पुढील दिवसांत या वक्तव्याच्या पार्श्वभूमीवर राजकीय वातावरण तापण्याची शक्यता वर्तवली जात आहे.
