अकोला न्यूज नेटवर्क
बुलढाणा | भाऊ-बहिणीच्या प्रेमाचा प्रतीक असलेला रक्षाबंधन सण यंदा ९ ऑगस्ट २०२५ रोजी साजरा होणार आहे. या निमित्ताने बहिणीने भावाला पाठवलेली राखी वेळेत व सुरक्षित पोहोचावी यासाठी बुलढाणा डाक विभागाने विशेष “राखी मेल सेवा” सुरू केली आहे.
या विशेष मेल सेवेअंतर्गत बुलढाणा विभागातील सर्व प्रमुख, उप व शाखा डाकघरे यांच्यामार्फत राखी, ग्रीटिंग कार्ड्स आणि भेटवस्तू देशभर सहज पाठवण्याची सुविधा उपलब्ध करून देण्यात आली आहे. डाक विभागाच्या या उपक्रमामुळे अनेक कुटुंबांना आपले प्रेम वेळेत व्यक्त करण्याची संधी मिळणार आहे.
सेवेची वैशिष्ट्ये
या सेवेअंतर्गत राख्या स्पीड पोस्ट व रजिस्टर्ड पार्सल सेवेद्वारे पाठवल्या जातील. या माध्यमातून राखी, भेटवस्तू व शुभेच्छापत्रे जलद व सुरक्षित पद्धतीने पोहोचविण्याची हमी डाक विभागाने दिली आहे. याशिवाय, ट्रॅकिंग सुविधा देखील देण्यात आली असून, ग्राहक आपल्या स्पीड पोस्ट पॅकेजेसचा इंटरनेटद्वारे मागोवा घेऊ शकतात.
आंतरराष्ट्रीय सेवाही उपलब्ध
फक्त देशांतर्गतच नव्हे, तर परदेशातही राखी पाठवण्याची सुविधा या विशेष मेल अंतर्गत उपलब्ध आहे. एनआरआय किंवा परदेशात वास्तव्यास असलेल्या भावांसाठी बहिणींना ही सेवा लाभदायक ठरणार आहे.
नागरिकांना आवाहन
बुलढाणा डाक विभागाचे अधीक्षक गणेश बा. आंभोरे यांनी नागरिकांना या सेवेचा लाभ घ्यावा, आणि आपल्या भावंडांशी प्रेमाची नाळ अधिक दृढ करावी असे आवाहन केले आहे. रक्षाबंधनाचा सण प्रेम, आपुलकी आणि नात्यांचा गहिरा बंध व्यक्त करणारा आहे. डाक विभागाच्या या प्रयत्नामुळे तो अधिक संस्मरणीय ठरणार आहे.
राखी मेल सेवा ही केवळ एक पोस्टल सेवा नसून, ती भावनिक बंधांची जोड देणारी एक महत्वाची साखळी आहे. या उपक्रमामुळे डाक विभागाचा विश्वास नागरिकांमध्ये अधिक दृढ होईल, अशी अपेक्षा व्यक्त केली जात आहे.
