अकोला न्यूज नेटवर्क ब्यूरो
पुरी (ओडिशा) : जगन्नाथ रथयात्रेसारख्या भव्य धार्मिक सोहळ्यात पुन्हा एकदा हृदयद्रावक दुर्घटना घडली आहे. ओडिशाच्या पुरी येथे २९ जूनच्या पहाटेच्या सुमारास रथयात्रेदरम्यान झालेल्या चेंगराचेंगरीत तीन भाविकांचा मृत्यू झाला असून ५० हून अधिक भाविक जखमी झाले आहेत. मृतांमध्ये दोन महिला आणि एका वृद्धाचा समावेश आहे.
रथयात्रेच्या मार्गावर मृत्यूची सावली
पुरीतील जगप्रसिद्ध रथयात्रा शनिवारी पहाटेपासून सुरू झाली. भगवान जगन्नाथ, बलभद्र आणि देवी सुभद्रा यांचे रथ गुंडिचा मंदिराजवळ पोहोचताच अचानक गर्दीचा ताण वाढला. सुमारे साडेचारच्या सुमारास दर्शनासाठी गर्दी वाढली, आणि त्यात काही जण खाली पडल्यामुळे चेंगराचेंगरी झाली.
मृतांमध्ये ओडिशातील खुर्दा जिल्ह्यातील प्रभाती दास, बसंती साहू आणि प्रेमकांत मोहंती यांचा समावेश आहे. तिघांचेही मृतदेह शवविच्छेदनासाठी पाठवण्यात आले असून, त्यांच्यावरील अंत्यसंस्कार स्थानिक पद्धतीनुसार करण्यात येणार आहेत.
अपुरी यंत्रणा आणि अनियंत्रित गर्दी
घटनास्थळी उपस्थित असलेल्या भाविकांच्या म्हणण्यानुसार, पोलिस व प्रशासनाची तयारी अपुरी होती. गर्दी नियंत्रणासाठी पुरेशा सुरक्षा बंदोबस्ताचा अभाव होता. रथ जवळ येताच उपस्थित हजारो भाविकांनी पुढे सरसावण्याचा प्रयत्न केला, यामुळे काही जण चेंगरले गेले.
पुरीचे जिल्हाधिकारी सिद्धार्थ एस. स्वैन यांनी घटनेची पुष्टी करत सांगितले की, जखमींपैकी सहा जण गंभीर असून त्यांना आयसीयूमध्ये ठेवण्यात आले आहे. प्रशासनाकडून चौकशी सुरू करण्यात आली असून, अतिरिक्त सुरक्षा फोर्स रथमार्गावर तैनात करण्यात आला आहे.
पूर्वसंध्येलाही गोंधळ
घटनेच्या पूर्वसंध्येला, म्हणजे शुक्रवार २८ जून रोजी, गर्दीमुळे तब्बल ६२५ भाविकांना गुदमरल्याची तक्रार होती. कडक उन्हात आणि आर्द्रतेमुळे अनेक भाविक बेशुद्ध पडले होते. त्यांना शासकीय रुग्णालयात दाखल करण्यात आले. उलट्या, चक्कर येणे आणि डिहायड्रेशनच्या तक्रारी मुख्यतः होत्या.
राजकीय आरोप-प्रत्यारोपांची मालिका
ही दुर्घटना घडल्यानंतर लगेचच राजकीय आरोप-प्रत्यारोप सुरू झाले. बीजेडीचे नेते आणि माजी मुख्यमंत्री नवीन पटनायक यांनी रथयात्रेच्या विलंबावर सत्ताधारी भाजप सरकारवर टिका केली. “ही अव्यवस्थेची परिणती असून यामुळे धार्मिक परंपरेला तडा गेला आहे,” असे म्हणत त्यांनी सरकारवर ताशेरे ओढले.
त्यावर प्रत्युत्तर देताना राज्याचे कायदामंत्री पृथ्वीराज हरिचंदन यांनी बीजेडीवरच दोष ठेवला. “१९७७ पासून ही रथयात्रा दुसऱ्या दिवशी गुंडिचा मंदिरात पोहोचते. पूर्वीच्या सरकारांनीच भगवान जगन्नाथाचा अपमान केला होता,” असे विधान करत त्यांनी आक्रमक भूमिका घेतली.
भाविकांमध्ये भीती आणि शोक
पुरीतील या दुर्दैवी घटनेमुळे संपूर्ण राज्यभरात शोककळा पसरली आहे. सोशल मीडियावर भाविकांनी संताप व्यक्त करत योग्य व्यवस्थेची मागणी केली आहे. भाविकांचे म्हणणे आहे की, एवढा मोठा धार्मिक सोहळा असताना प्रशासनाची नियोजनशून्यता ही नाकारता येणार नाही.
ओडिशा सरकारकडून जखमींना मोफत उपचार आणि मृतांच्या कुटुंबीयांना आर्थिक मदतीचे आश्वासन देण्यात आले आहे. तथापि, प्रशासन आणि सुरक्षा यंत्रणांकडून भाविकांच्या जीवित सुरक्षेला अधिक प्राधान्य देण्याची मागणी सर्वसामान्यांकडून होत आहे.
