अकोला न्यूज नेटवर्क ब्युरो
केनेडी स्पेस सेंटर, अमेरिका : भारतीय अंतराळ क्षेत्रासाठी आजचा दिवस अभिमानाचा ठरला आहे. भारतीय वायूदलाचे ग्रुप कॅप्टन शुभांशू शुक्ला यांनी २५ जून २०२५ रोजी दुपारी १२:०१ वाजता नासाच्या केनेडी स्पेस सेंटरवरून ‘ॲक्सिऑम-४’ मोहिमेअंतर्गत आंतरराष्ट्रीय अंतराळ स्थानकाच्या दिशेने झेप घेतली.
ही मोहीम नासाच्या फॉल्कन-९ रॉकेटद्वारे यशस्वीरीत्या प्रक्षेपित करण्यात आली असून, शुक्ला हे नासाच्या मान्यतेसह अवकाशात झेपावणारे पहिले व्यावसायिक भारतीय अंतराळवीर ठरले आहेत. त्यांच्या या यशामुळे देशभरात आनंदाचं वातावरण आहे.
१९८४ च्या इतिहासाची पुनरावृत्ती
भारतीय अंतराळयात्रेचा इतिहास पाहता, राकेश शर्मा यांनी ३ एप्रिल १९८४ रोजी सोव्हिएत युनियनच्या मदतीने भारताचं अंतराळात प्रतिनिधित्व केलं होतं. त्यानंतर तब्बल ४१ वर्षांनी शुभांशू शुक्ला यांनी आंतरराष्ट्रीय अवकाश स्थानकाच्या दिशेने उड्डाण केलं आहे. त्यामुळे ही मोहीम भारतासाठी ऐतिहासिक ठरली आहे.
‘ॲक्सिऑम-४’ मोहिमेतील भारतीय सहभाग
‘ॲक्सिऑम स्पेस’ ही खाजगी अंतराळ संस्था नासाच्या सहकार्याने ‘ॲक्सिऑम-४’ ही मोहीम राबवत आहे. यामध्ये चार देशांचे अंतराळवीर सहभागी आहेत आणि त्यापैकी शुभांशू शुक्ला हे एकमेव भारतीय सदस्य आहेत. त्यांनी या मोहिमेसाठी गेल्या वर्षभरात अत्यंत कठोर प्रशिक्षण पूर्ण केलं आहे.
कोण आहेत शुभांशू शुक्ला?
शुभांशू शुक्ला हे मूळचे उत्तर प्रदेशातील लखनौचे रहिवासी असून ते भारतीय वायूदलात ग्रुप कॅप्टन म्हणून कार्यरत आहेत. संरक्षण क्षेत्रातील दीर्घ अनुभव, मानसिक आणि शारीरिक तयारी, विज्ञानातील जाण आणि शिस्तबद्ध कारकीर्द यामुळे त्यांची निवड या अत्युच्च मोहिमेसाठी करण्यात आली.
भारतासाठी मोठा क्षण
शुक्ला यांच्या या झेपेमुळे भारताचं अंतराळ क्षेत्र पुन्हा एकदा जागतिक पटलावर झळकलं आहे. देशातील तरुणांना विज्ञान आणि संशोधन क्षेत्रात प्रेरणा देणाऱ्या या मोहिमेमुळे नव्या पिढीला अंतराळ विज्ञानाकडे वळण्याची नवी दिशा मिळेल.
अवकाशातून देशासाठी संदेश?
मिळालेल्या माहितीनुसार, आंतरराष्ट्रीय अंतराळ स्थानकावरून शुभांशू शुक्ला येत्या काही दिवसांत भारतासाठी खास संदेश देणार आहेत. त्यांच्या आवाजात अवकाशातून पहिल्या शुभेच्छा ऐकण्याची उत्सुकता देशवासीयांना लागून राहिली आहे.
